Rêveberê Rêxistina DEM Partiyê ya Stenbolê Çetîn Yilmaz û Hevberdevka Stenbolê Dîdem Yilmaz bal kişandin ser êrişên li ser Rojavayê Kurdistanê û bang li her kesî kirin ku tev li meşa Roja Rojava a Cîhanê bibin.
Berxwedana gelê Kurd û dostên wan ên li derdora Rêveberiya Xweser a Bakur Rojhilatê Sûriyê berdewam dike. Li ser banga banga zêdeyî 30 sazî dezgehên Kurdistanî û dostên wan dê 1ê Sibatê wekî Roja Rojava a Cîhanê hate ragihandin. Sibê dê li çar perçeyên Kurdistanê û cîhanê gel ji bo Rojava dakevin qadan. Kongreya Demokratîk a Gelan (HDK), DEM Partî û Tevgera Jinên Azad (TJA) ji bo piştgiriya berxwedana Rojava û 1ê Sibatê Roja Rojava ya Cîhanê dê li navçeya Qada Îskeleyê ya Kadikoyê saet 15.00an de meşek li dar bixe. Dê gel di saet 15.00an de li pêşiya Peykera Bogayê kom bibe û heta Qada Îskeleyê bimeşê.
‘Em dixwazên demildest ev şer bê rawestandin’
Rêveberê DEM Partiyê yê Stenbolê Çetîn Yilmaz û Hevberdevka Stenbolê Dîdem Yilmaz bang li gelê Kurd û dostên wan kirin ku bi rihê seferberiyê tev li meş û mitîngê bibin. Çetîn Yilmaz bi bîr xist ku ji 6ê Çileyê ve êrişêk li ser Rojava heye û wiha axivî: “Îro li rojavayê Kurdistanê dorpêçek heye û bi vê tê xwestin ku hemû deskeftiyên Kurdan tune bikin. Li Rojava şerekî dijwar diqewime, gelê sivîl di şerde gelek zor û zehmetiyê dibîne. Ligel hemû zor û zehmetiyan jî li ber xwe didin. Kehrebe, înternet û sotemenî nemaye. Zarok ji sermayê dimirin. Em dê daxwaza rawestandina şer û vekirina korîdora mirovahî bikin. Ji Stenbolê em dê bang bikin ku dewleta Tirk û dewletên hegemon ji dev vê polîtîkayên ku li dijî gelê Kurd in berdin. Di pêvajoya ‘Aştî û Civaka Demokratîk’ de êrişên li ser Rojava komplo ne.”
‘Divê gelê Kurd li ser piyan be’
Çetîn Yilmaz destnîşan kir ku ew bang li tevahî gelan dikin ku tev li meşê bibin û ev tişt anî ziman: “Gelê Kurd li Rojava bi taybet jî li Kobaniyê rûmeta tevahî mirovahiyê parast. Gelê Kurd rê neda ku çeteyên hov ên DAIŞê xwîna mirovahiyê birijînin û peşî li tarîtiya DAIŞê girt. Îro dîsa heman zîhniyeta tarî bi navên cuda êrişî gelê Kurd dike. Me Kobanî parast, Kobanî bi vê berxwedanê bû Vîetnama Rojhilata Navîn. Divê gelê Kurd li qadan li ser piyan be. Me heta niha hemû deskeftiyên xwe bi berxwedanê bi dest xistine. Divê hemû cîhan bibîne ku careke din Kurd û dostên wan û şoreşgerên enternasyonal çawa li ber xwe didin.”
‘Em dê li Stenbolê dengê xwe bilind dikin’
Dîdem Yilmaz jî anî ziman ku ji bo şerê li Rojava rawestînin ew meşekê li dar dixin û wiha got: “Hêzên emperyalist li Rojhilata Navîn projeyên nû li gelê Kurd re ferz dikin. Ji bo qeyrana jiyanî ji holê rabe divê korîdorên jiyanê bên vekirin. Em wekî HDKê li dijî van dê li Stenbolê dengê xwe bilind bikin. Di roja yekşemê saet 15.00an de li Kadikoyê tên gel hev. Deng bidin dengê gelan.” Yilmaz bang li her kesê kir ku tev li vê meş û mitîngê bibe.
