Amed – Bavê Mahsûm Karaoglan, Abdûrrahman Karaoglan ku di salvegera kuştina kurê xwe de axivî, diyar kir ku 16 sal in doza kurê wî û hevalê wî encam negirtî ye û destnîşan kir ku dê li pey doza kurê xwe bin.
Di 4ê Nîsana 2009an de bi boneya rojbûna Rêberê Gelê Kurd Abdullah Ocalan ber bi gundê Amara yê Xelfetî ya Rihayê ve meşa “Rêwîtiya ber bi Rojê ve” hatibû lidarxistin. 10 hezar kes tev li meşê bûbûn û dema meşvan ber bi Amarayê ve dimeşiyan, li devera Karataşê ya navçeya Bêrecûkê pêşiya wan ji hêla polîs û leşkeran ve hatibû girtin. Polîs û leşkeran bi bombeyên gazê êrişî meşvanan kiribûn. Xwendekarê Zanîngeha Dîcleyê Mahsûm Karaoglan û Mûstafa Dag ê ji navçeya Pirsûsê ji ber bombeyên gazê yên hatin avêtin jiyana xwe ji dest dan. Dozgeriya Komarê ya Bêrecûkê têkildarî qetilkirina Karaoglan û Dag lêpirsîn da destpêkirin lê ev 16 sal in tu pêşketin çênebûn. Bavê Mahsûm Karaoglan, Abdûrrahman Karaoglan di salvegera kuştina kurê xwe de axivî û qala wê pêvajoyê kir.
‘Navê Mahsûm Karaoglan ji parke rakirin’
Abdûrrahman Karaoglan qala jiyana kurê xwe Mahsûm Karaoglan kir û anî ziman ku ew û Mahsûm weke hevalan bûn. Abdûrrahman Karaoglan ku kurê xwe û Mûstafa Dag bi bîr anîn wiha got: “Di 4ê Nîsanê de ez jî çûm Amarayê. Dewleta tirk hezim nekir û gaz û bombe ser mirovan reşandin. Mahsûm û Mûstafa Dag li wir şehîd bûn. Heta ku em sax bin em ê li pey doza wan bin. Em ê di rêya wan de bin.” Abdûrrahman Karaoglan da zanîn ku piştî Mahsûm Karaoglan hate kuştin Şaredariya Erxeniyê ya wê demê navê wî li parkekê kir û ev tişt gotin: “Dema qeyûm hate tayînkirin, ji navê wî hezim nekirin û rakirin. Navekî mirovên xwe lê kirin. Dilê min bi vê yekê êşiya.”
‘Mahsûm stûna dilê me bû’
Abdûrrahman Karaoglan behsa roja ku Mahsûm Korkmaz hate kuştin kir û wiha berdewam kir: “Ez çûm Amarayê û ji ber dozekê vegeriyam. Dema şehîd ket ji Bîrecîkê anîn Rihayê ez li wir gihiştimê. Rojeke tarî bû. Mahsûm stûna dilê me bû. Hate şikandin. Diya wî jî wisa bû. Dema niha jî qala wî dikin xemgîn dibin. Mahsûm hem xwendevanê me bû hem jî di malê de yê biçûk bû. Weke hevalekî em bi hev re bûn. Barekî giran bû.”
‘Heta sax bim ez ê li ser şopa kurê xwe bim’
Abdûrrahman Karaoglan, bal kişand ser doza têkildarî kuştina Mahsûm Korkmaz û Mûstafa Dag hatiye vekirin û av agahî dan: “Doz 14-15 sal in encam negirtî ye. Me bir DMMEyê hêj li wir e. Îsal polîsan ba me kir. Gotin ‘hûn dest ji doza xwe berdidin an na?’ Min jî got em ê çawa dest ji doza xwe berdin, hem qetil bikin hem jî ez dest ji doza xwe berdim? Em li vê dinyayê jî li axretê jî dozdar in. Ev 14-15 sal in tiştek derneketiye.” Abdûrrahman Karaoglan, destnîşan kir ku heta sax be dê li ser şopa kurê xwe be û wiha domand: “Em nikarin doza xwe berdin.”
‘Divê pergal ji bo çareseriyê xwe biguherîne’
Abdûrrahman Karaoglan, bal kişand ser pîrozbahiya rojbûna Rêberê Gelê Kurd Abdullah Ocalan û wiha pê de çû: “Kesên ku derfetên wan hebe, bila tev li bibin. Ev yek serbilindî ye. Hêvî dikim ku dê serkeftin a gelê kurd be.” Abdûrrahman Karaoglan, bal kişand ser banga Rêberê Gelê Kurd Abdullah Ocalan a di 27ê Sibatê de û wiha dirêjî da axaftina xwe: “Ev pêvajo yek alî nameşe divê pergal gavekê biavêje. Gelê kurd girêdayî Serokatî ye. Serok çi bêje li pey wî ne, wî qebûl dikin. Ji ber vê yekê divê pergal ji bo çareseriyê xwe biguherîne.”
‘Divê Serokatî bi awayekî fizîkî azad bibe’
Abdûrrahman Karaoglan, axaftina xwe bi van gotinan bi dawî kir: “Xwediyê vê dozê yê bingehîn Serokatî ye. Xwediyê dozê di nava dozê de nebe, av di rê de naçe. Wesayît bê ajokar di rê de naçe. Divê Serokatî bi awayekî fizîkî azad bibe ku bikare kongreya PKKê kom bike. Du hefteya carekê bi çûyîna Îmraliyê nabe. Divê îro Serokatî di nava gel de be.”
