Li Cizîra Botanê bi hezaran kes li dijî êrişên ser Rojava meşiyan. Hevserokê Giştî yê DBPê Keskîn Bayindir bertek nîşanî êrişan da û got: “Em jî maf û azadiyê dixwazin. Lê li wir dengê top û bombeyan li vir stranên aştiyê nabe. Polîtikayeke rast û dirûst bikin.”
Platforma Saziyên Demokratîk a Şirnexê, li dijî êrişên ser Rojava li navçeya Cizîrê ya Şirnexê meşek girseyî ku ji hezaran kes pêk dihat li dar xist. Meşê li taxa Cudî dest pê kir û li ber Şeredariya Cizîrê bi dawî bû. Hevserokê Giştî yê Partiya Herêmên Demokratîk (DBP) Keskîn Bayindir, parlamenterên DEM Partiyê yên Şirnexê Newroz Uysal Aslan, Mehmet Zekî Îrmez, endam û nûnerên partiyên siyasî û saziyên civakî yên pêkhateyên platformê û bi hezaran welatî tev li meşê bûn.
Girseyê pankarta li ser, “Rojava wîjdan e, berxwedan e û azadî ye, teslîm nabe” dinivisî vekirin û bênavber dirûşmeyên, “Bijî berxwedana Rojava”, “Şehîd namirin”, “Silav silav ji Îmraliyê re hezar silav”, “Rojava Rojhilat e Kurdistan yek welat e”, “Rojava rûmete me ye” û bi gotina stranan meşiyan. Piştî meşê di şexse Zeyad Heleb de ji bo cangoriyên azadiyê rêz hate girtin. 0
Piştî rêzgirtinê axaftin hatin kirin. Ewilî Newroz Uysal Aslan axivî. Newroz Uysal Aslan berxwedana Rojava silav kir û got: “Îro Rojava di bin xetereyeke mezin de ye. Lê îradeya parastina hebûna me ji wan hemû hezan xurttir e. Em li vir dibêjin, gelê Kurd dê bi berxwedana xwe êrişan bişkîne.”
‘Rojava jî bi qasî keştiya Nûh bi qîmet e’
Piştre jî Hevserokê Giştî yê DBPê Keskîn Bayinidr axivî. Keskîn Bayindir anî ziman ku gelê Cizîra Botan bi xwedîderketina li berxwedana Rojava carek din gelê Kurd serbilind kir û wiha axivî: “Dengê we îro gehişt Hesekê, Efrînê û Kobanê. Dengê me gehişt Rojhilatê Kurdistanê ku ji bo azadiya xwe li ser pêya ye. Em berxwedana Helebê silav dikin. Ev meşa Botanê bû wîjdana gelê Kurd. Li kêleka me zilm û qirkirin heye. Em jî dibêjin em vê zilm û qirkirinê qebûl nakin. Kurdîtiya me û welatparêziya me qebûl nakin. Em ji rayedarên Tirkiyeyê û dewletên navneteweyî re dibêjin; Kurd vê zilmê qebûl nakin. Şerekî qirêj bi pêşengiya heşmendiya DAIŞê li dijî destkêftiyên Kurd tê kirin. Em li vir dibêjin; Li vir çawa keştiya Nûh ji bo rizgariya mirovahiyê bi qîmet e, Rojava jî bi qasî keştiya Nûh bi qîmet e.”
‘Li wir şer li vir aştî nabe’
Keskîn Bayindir destnîşan kir ku li ser gelê Kurd planeke qirêj tê meşandin û wiha got: “Ew dibêjin em ê li vir pêvajoyê pêş bixin. Em jî dibêjin; weke gelê Kurd em ji aştî û biratiyê dixwazin. Em jî maf û azadiyê dixwazin. Lê li wir dengê top û bombeyan li vir stranên aştiyê nabe. Polîtikayeke rast û dirûst bikin. Gelê Kurdistanê jji aştiyeke bi rûmet re amade ye. Ji ber wê em dibêjin bila dewleta Tirkiyeyê dev jî van polîtikayên xwe yên qirêj berde. Dibêjin em ji bo piştgiriya DAIŞ û HTŞ amade ne. Dev jî vê heşmendiya xwe ya piştgiriya HTŞ ya DAIŞê berdin. Em jî li vir aştiyeke mayinde ava bikin. Em aştiyeke mayinde, statuya xwe û azadiya zimanê xwe dixwazin. Heke hûn zilmê li ser serê me bidin meşandin, em ê serî natewînin. Li ciwan û dayikan binêrin, Tu kes ji we re serî natewînê.”
‘Em ê serî netewînin’
Keskîn Bayindir di dawiya axaftina xwe de bal kişand ser bêdengiya qada navneteweyî û got: “Bêdengiya dinyayê zilmê li ser gelê Kurd ferz dike. Gelê me bêdengiya we jî baş dizane û hesabê wê jî dike. Em bang li cîhanê dikin ku bêdeng nemînin. Hişmendiya HTŞê li dijî mirovahiyê ye. Ji ber vê yekê em dibêjin bêdeng nemînin. Ji Botanê em bang li wîjdan û mirovahiyê dikin; em bi tenê jî bimînin em ê vê rûmetiyê tu car qebûl nakin.”
Çalakî bi berzkirina dirûşmeyan bi dawî bû.
