Bi pêşengiya MEBYA-DERa Êlihê de bi girseyî serdana şîna Mehmet Edîp Taşar, gerîlayên PKKê Nîhat Adin (Fırat), Kadîme Îmîr (Rojda) û Salîme Îmîr (Têkoşîn) hate kirin.
Bi pêşengiya Komeleya Yekîtî Çand Piştevanî û Alîkariyê ya bi Malbatên ku di Dergûşa Şaristaniyê de Xizmên Xwe Winda Kirine re (MEBYA-DER) ya Êlihê de bi girseyî serdana şîna Mehmet Edîp Taşar, gerîlayên PKKê Nîhat Adin (Fırat), Kadîme Îmîr (Rojda) û Salîme Îmîr (Têkoşîn) hate kirin. Şîna Mehmet Edîp Taşar ê dema girtî bû li nexweşxaneyê dihate dermankirin jiyana xwe ji dest da li Mala Şînê ya Tereceyê ya li Taxa Tilmercê hate ziyaretkirin.
Şîna gerîlayên PKKê Nîhat Adin (Firat) ku di sala 1995an de li Çiyayê Cûdî, Kadîme Imir (Rojda) ku di sala 1995an de li Botan û Selîme Imir (Têkoşîn) ku di sala 1995an de li Botanê jiyana xwe ji dest dabûn li Mala Şînê ya M. Salîh Mûtlû ya li Taxa Hîlal hate ziyaretkirin. Di şînê de rêveber û endamên partiyên siyasî, saziyên sivîl û gelek kes amade bûn. Girseya ku serdana van her du şînan kir dirûşma “Şehîd namirin” berz kir û wisa derbasî hundir bûn. Piştî re girseyê ji bo kesên ku di têkoşîna azadiya Kurd de jiyana xwe ji dest dane deqîqeyekê rêz girt û piştî rêzgirtinê dîsa dirûşma “Şehîd namirin” berz kir. Du re dua hatin kirin.
‘Şehîdên me bi beden û keda xwe hebûna Kurdan parastine’
Hevserokê TUAY-DERê Hasan Arigtekîn ku li şînê bû axivî û got: “Em her tim şehîdên xwe di dil û mêjiyê xwe de bi bîr tînin û li hemberî wan rêz digirin. Ji Kawayê Hesinkar heta Mazlûm Doganan di rêya azadiya vî welatî bedelên gelek giran dane. Şehîdên me bi beden û keda xwe hebûna Kurdan parastine. Dewleta desthilatdar ku îro di nava vê pêvajoyê de cih digire bi saya hevalên me yên ku ked dane ne. Em careke din dibêjin bijî Rêber Apo, bijî berxwedana zindanan û şehîd namirin.”
‘Şehîd şehîdên me hemûyan e’
Malbatên cangoriyan jî bi xêr hatina mêvanan kirin û gotin: “Şehîd şehîdên me hemûyan in. Mala we hemûyan ava be. Di serî de serê Rêberê Gelê Kurd Rêber Apo û gelê Kurd sax be. Şehîd namirin.”
Piştî serdanê şîn bi dawî bûn.
