Jinan di postên li ser medyaya dijîtal de bertekên tund nîşanî qûsandina keziya şervaneke YPJê ya ji aliyê çeteyekî ve nîşan da. Jinan dîmenên hûnandina keziyên xwe parve kirin û got: “Li şûna her keziyekê, bi milyonan kezî tên hûnandin.”
Çeteyekî girêdayî HTŞê bi navê Ramî El Deheş li bajarê Reqayê şervaneke YPJê şehîd dixe û piştre keziya wê yê hûnandî jê dike. Dîmenê vê hovîtiya xwe jî parve kiriye. Li ser torên medya dîjîtal li dijî vê yekê bertekên tund derketin pêş.
Jinên ciwan, rojnamevan û çalakvanên jin ên Kurd û dostên wan ên ku YPJê wek xelasiya civakê ji çeteyên hov dibînin, li dijî qûsandina keziya şervana YPJê helwestên xwe nîşan dan. Jinan dîmenên hûnandina keziyên xwe parve kirin, li ser dîmenan jî stranên ku balê dikişînin ser şoreşa jinan a Rojava helwesta xwe nîşan da. Li ser heman dîmenan nivîsa “Li şûna her keziyekê, bi milyonan kezî tên hûnandin”, “Jin, Jiyan, Azadî” û “Em ê bi wan keziyan dawiya we bînin” nivîsandin.
‘Ev kezî dê we bixeniqîne’
Jinên Êzidî ku YPJê ew ji hovîtiya DAIŞê xelas kirine jî kampanyayeke bi navê “Ev kezî dê we bixeniqîne” da destpêkirin.
Ji ber ku por di baweriya Êzîdatiyê de girîng e, xwedî ruh û manewiyat e, ev kampanya bi eleqeyeke mezin hat pêşwazîkirin.
