Bi hezaran şêniyên kantona Cizîrê berxwedêrên ku di êrişa balafirên artêşa Tirk a li ser Bendava Tişrînê de jiyana xwej i dest dabûn, oxir kirin.
Şanoger Cûma Xelîl Îbrahîm (Bavê Teyar), endamên Meclisa Malbatên Şehîdan Kêfo Osman û Ekrem Rexo, Hevseroka Ofîsa Partiya Yekitiya Demokratîk a Qamişlo Menîce Heyder û endamên Meclisa Qamişlo Muzefer Mihemed û Ebdulqadir Îbrahîm ku dema nobedariya bendava Tişrînê dikir, di êrişa artêşa Tirk de jiyana xwe ji dest dabûn li Pakrewangeha Şehîd Delîl Sarûxan hatin oxirkirin.
Bi hezaran Kurd, Ereb, Ermen, Suryan, nûnerên partiyên siyasî, Rêveberiya Xweseriya Demokratîk a Kantona Cizîrê, êlên Ereb, Meclisa Sûriyeya Demokratîk û oldar bi dirûşmên “Bi can û xwîna xwe em bi te re ne ey şehîd” pêşwaziya karwanê cangoriyan kir.
Piştî rêzgirtinê, endama Hevserokatiya Partiya Yekitiya Demokratîk Foza Yûsif axivî û got: “Ji bajarê Qamişlo, paytexta şehîdan, em berxwedana Hêzên Sûriyeya Demokratîk, Yekîneyên Parastina Gel-Jinê û gelê me yê ji bo azadiya xwe tê dikoşin, silav dikin. Dewleta Tirk dixwaze em di Sûriyeya nû de bê nasname bin û dewleteke navendî ku em tê de nebin xwedî maf. Em ji bo azadî û rûmeta xwe li ber xwe didin û em ê teslîmî jiyana koletî nebin”.
Fozayê tekez kir ku divê mafên gelê Kurd li Sûriyeyê bên misogerkirin û got: “Em ji çareseriyê re vekirî ne û eger ew di şer de israr bikin, em ê ketina Kobanî û Rojava qebûl nekin, em vê sozê didin gelê xwe.”
Hevserokê Kongreya Îslama Demokratîk a Bakur û Rojhilatê Sûriyê Mihemed Mela Reşîd El Xerzî jî axivî û got bendava Tişrînê bûye bendava berxwedana li hemberî dijminan, bendava şehîdan e.
Berdevka Kongra Star Rîhan Loqo jî diyar kir ku dewleta Tirk dixwaze komplo û planên mezin li dijî gelê me bimeşîne, her wiha dibêje em ê gelê Kurd tune bikin, lê gelê me tevî hevrêyên me yên şehîd bi cesaret û wêrekî ber bi Bendava Tişrînê ve çû û got: “Em Bendava Şehîdan, Bendava Rûmetê bernadin. ”
Helbestvan Ferhad Merdê jî xîtabî şanoger Cûma Xelîl (Bavê Teyar) kir û got: “Xwezî tu îro di nava me de bûya da ku te dîtiba bê çi qas gel ji bo te rabûye ser pêyan.” Merdê destnîşan kir ku bendava Tişrînê rûmeta gelên Bakur û Rojhilatê Sûriyeyê ye û nehêlin ew hilweşe û wê mîna Kobanê bibe sembol.
Piştî merasîmê, bi hezaran kes darbestan li ser milê xwe kirin û birin li Pakrewangeha Şehîd Delîl Sarûxan spartin axê.
