Di 27ê Mijdarê de bi diron û muşekan êrîşî Qada Gazê ya Xor Morê kirin. Heya niha 10 caran êrişî Qada Gazê ya Xor Morê hatiye kirin, dema ev qad ji bo Herêmê weke alternatîfek cihê Îranê tê behskirin, êriş ser çêdibe.
Şeva 27ê Mijdarê saet di 11:30an de bi dron û muşekê êrişî Qada Gazê ya Xor Morê ya navçeya Çemçemalê kirin. Agir bi yek ji depoyên sereke yên gazê ket. Di êrişê de ti ziyanên canî çênebûn. Lê ziyanek mezin a madî gihişt santralê. Şev û roj elektrîka bajar û navçeyên Herêma Kurdistanê bi gaza wê santralê tê hilberîn. Ji ber êrîşê elektrîka tevayî Herêma Kurdistanê qut bû û dîsa hat. Elektrîka Herêmê ji 4 hezar megawatan daket hezar megawatan. Ev bû sedem ku elektrîka 24 saetî daket 5 saetan.
Li Qada Gazê ya Kormorê, gaza LPG ku hem ji bo malan hem jî ji bo elektrîka 24 saetî tê karanîn, tê hilberandin. Ji bilî Herêma Kurdistanê elektrîka ku ji bo hin bajarên Iraqê jî dihat dayîn qut bû ku hezar û 700 megawate. Piştî 10 saetan şewata ku li santralê derketibû, hate vemirandin lê hîna jî elektrîk nevegeraye ser rewşa xwe ya asayî.
Di nava sê salên borî de ev 10emîn care êrişî ser Qada Gazê ya Kormor tê kirin. Di sala 2022yan de 5 caran, di sala 2023yan de carek, di sala 2024an de 2 car û di sala 2025an de jî 2 car êriş li ser çêbûne. Di êrişa sala 2024an de 4 kesên biyanî hatin kuştin. Lê di êrişên din de tenê ziyanên madî çêbûn.
Piştî êrişê hikûmeta Herêma Kurdistanê daxwaz ji Amerîka û hevpeymanan kir ku sîstema parastina muşekan bide Herêma Kurdistanê daku xwe pê biparêze. Deshilat û berpirsên aliyên siyasî yên Herêma Kurdistanê ragihandin ku ev êriş ji aliyê komên çekdar ên li dervey dewleta Iraqê ne, hatiye kirin. Gotin divê ev komên çekdar werin kontrolkirin û çekên di destên wan de ne bikevin di jêr destê dewletê de.
Berpirsê karûbarê balyozxaneya Amerîka ya Bexdayê jî di daxuyaniyek de ragihand ku pêwîste sîstema parastinê li Herêma Kurdistanê were bihêzkirin daku rê li dubarebûna van êrişan were girtin.
Balyozxaneya Ingilîstanê ya li Herêma Kurdistanê jî ji ber êrişê fikarên xwe anîn ziman û daxwaz kir ku di derbarê aliyên ku êriş pêkanîne de lêpirsîn were kirin.
Li aliyê din Serokwezîrê demkî yê Iraqê Mihemed Şiya Sûdanî jî êriş bi tûndî şermezar kir û ragihand ev êrişeke li dijî hemû Iraqê, kesên ev êriş kirine divê werin girtin, dadgehkirin û cezakirin.
Bi fermana Sûdanî, bi lezûbez komîsyonek a lêkolînê ku ji wezîrê karên hindir, serokê îstixbarata Iraqê, wezîrê neftê û wezîrê karên hindir yê Herêmê Rêber Ehmed pêkdihat, hate avakirin û serdana Qada Gazê ya Xor Morê kirin. Biryare komîsyon rapora xwe amade bike û radestî serokwezîr bike û encamên wê ji raya giştî re ragihînin.
Li aliyê din balyozê Îranê yê Herêma Kurdistanê jî di daxuyaniyek de ragihand êriş ji aliyê kêve pêkhatibe nayê qebûlkirin û wek êrişek li dijî aramiya Herêma Kurdistanê pênase kir.
