Enqere – Dayikên Aştiyê ku li dijî êrişên çeteyên giredayî HTŞê û Tirkiyeyê berê xwe dan Enqereyê destnîşan kirin ku destê Tirkiyeyê jî di êrişan de heye û gotin ku ew ji bo ji rêyedaran re bêjin ‘Li gorî pêvajoyê tevbigerin’ û êrişan rawestînin.
Dayikên Aştiyê ji bajarên Bakurê Kurdistanê û metropolên Tirkiyeyê li dijî êrişên komên çeteyên giredayî HTŞê û Tirkiyeyê berê xwe dan Enqereyê. Dayikên Aştiyê li pêşiya avahiyê Wezaretê Karên Dervê kom bûn û bertek nîşanî hevkariya Tirkiyeyê ya bi çeteyan re dan. Dayikên Aştiyê li ber Wezareta Wezîrê Karên Derve bang li Hakan Fîdan ê gefan li dijî Rêveberiya Xweser a Bakur û Rojhilatê Sûriyeyê dixwe, kirin û îstîfaya wî xwestin. Dayikên Aştiyê piştî çalakiya xwe li Enqereyê vegeriyan bajarên xwe. Dayik bi peyama li Enqereyê dane destnîşan kirin ku heta êriş bên rawestandin û aştiyeke mayinde pêk were ew ê çalakiyên xwe bidomin.
‘Em di daxwaza aştiyê de bi israr in’
Ji Dayikên Aştiyê Fatma Yilmaz ku ji Stenbolê bi daxwaza rawestandina êrişan hatibû Enqereyê bi lêv kir ku ew li dijî şer in û ev tişt gotin: “Em dibêjin êdî bes e bila şer nebe. Aştiyeke mayindê pêk were. Em ji bo aştiyê hatinê lê ew daxwaza aştiyê jî asteng dikin. Li Şêxmeqsûd û Eşrefiyê gelê me qetil dikin. Em jî hatin Enqereyê ku peyama aştiyê bidin û bejin van êrişan rawestînin û bila ew şer bisekine. Ew çi bikin jî em ê di daxwaza xwe ya aştiyê de israr bikin.”
‘Tişta Silopiyayê li Şêxmeqsûd û Eşrefiyê jî pêk hat’
Ji Dayikên Aştiyê Zeynep Bernîz ji Silopiyayê li dijî êrişên hatibû Enqereyê bal kişand ser êrişên Tirkiyeyê û wiha got: “Çawa li Silpiyayê di şerê bajaran de taxên me hatinê bombebaran kirin niha jî li Şêxmeqsûd û Eşrefiyê tax hatin bombebarankirin. Niha Şêxmeqsûd û Eşrefiyê jî weke Silopiya û Cizîrê di bin êrişan de ne. Bi hezaran kes şandinê li 2 taxan. Em jî dixwazin li Enqereyê re peyamê bidin bêjin li gor pêvajoyê tevbigerin van êrişan rawestînin. Zarok, pîr û kalan qetil dikin. Em naxwazin bila kes bê kuştin. Bila aştiyeke mayinde pêk were.”
‘Li aliyekê muzekere dikin li aliyên din planan’
Dayika Aştiyê Melîha Gokgoz li Stenbolê ber bi Enqereyê ve hatiyê destnîşan kir ku li ser Kurdan bazariya şer dikin û wiha pê dê çû: “Ji aliyekî ve bi me re muzakere dikin û ji aliyê din ve li ser me planan dikin û zarokên me qetil dikin. Di dîroka dinayayê de yek ji qetlîma herî qirêj a li dijî mirovahiyê pêk hat. Hakan Fîdan hevkariyê bi DAIŞê dike. Colanî DAIŞî ye. Li dijî Elewî û Durziyan komkujî kirin. Niha jî wan komkujiyê li dijî Kurdan pêk tînin. Em van kirinan tundî şermezar dikin. Bila Hakan Fîdan jî îstîfa bike.”
‘Destê Tirkiyeyê tê de heye’
Dayika Aştiyê Emîne Erbay jî diyar kir ku ew ji bo pêşî li komkujiyan bigirin hatinê ku dengê xwe bigihînin rêyedarên Tirkiyeyê û wiha axivî: “Destê Tirkiyeyê jî di êrişên li ser taxên Şêxmeqsûd û Eşrefiyê heye. Em dibêjin aştî lê li ku ye aştî? Em dibêjin aştî lê ew zilm û zorê dikin. Em dixwazin xwîn bisekine.”
