Serokwekîlên DEM Partiyê Gulistan Kiliç Koçyîgîtê û Sezaî Temelî bi parlamenteran ve li dijî îtîraza Wezareta Dadê ji bo biryara DMMEyê ya derheqê Selahattîn Demîrtaş de daxuyanî dan û di daxuyaniyê de pirsin; “Bi vî awayî dê çawa aştî were?”
Serokvekîlên Koma Meclîsê ya Partiya Wekhevî û Demokrasiyê ya Gelan (DEM Partî) Gulistan Kiliç Koçyigit û Sezaî Temelli li dijî îtîraza Wezareta Dadê ku ji bo biryara Dadgeha Mafê Mirovan a Ewropayê (DMME) derbarê Hevserokê Giştî yê Partiya Demokratîk a Gelan (HDP) û doza Kobanê li ber Wezareta Dadê daxuyanî dan. Parlamenterên DEM Partiyê jî tev li daxuyaniyê bûn. Parlamenterên ku di destê wan de wêneyên Hevserokên Giştî yên HDPê yên berê Figen Yuksekdag, Selahattin Demirtaş û girtiyên ji doza Kobanê hebûn, bi meş hatin ber wezaretê. Girseyê di meşê de bênavber dirûşmeyên, “Girtiyên siyasî rûmeta me ne” berz kir.
Gulistan Kiliç Koçyigit li vir axivî û anî ziman ku ew îtîraz ne li gor pêvajoya aştiyê ye û got ku Tirkiye biryarên DMMEyê bin pê dike. Gulistan Kiliç Koçyîgîtê bi bîr xist ku DMMEyê 3 caran derbarê Selahattin Demîrtaş de biryara berdanê daye û ev tişt gotin: “Hevalên me hene ku bi salan in di Doza Komploya Kobanê de bi awayekî neheq û neqanûnî girtî ne. Birêz Demîrtaş, Birêz Yüksekdağ û hemû hevalên me yên din bi salan e di encama darizandineke siyasî de dîl hatine girtin û wekî rehîn têne girtin. Duh, Wezareta Dadê li Strasbourgê îtîraz li biryara sêyemîn a DMMEyê ya li dijî Demîrtaş kir. Em dixwazin ji Wezareta Dadê û hikûmeta AKPê bipirsin, hûn li benda çi ne ku hûn van biryaran bicîh bînin? Niha gelê me ji me dipirse: Ew behsa aştî û demokrasiyê dikin, lê dîsa jî Demîrtaş, hevkarên me yên li Geverê û Doza Komploya Kobanê di girtîgehê de digirin. Ev aştî dê çawa were bidestxistin? Gelo aştî bi girtina hevalên me yên di doza Komploya Kobanê de, tevî Demîrtaş û Yüksekdağ, di girtîgehê de dikare were avakirin? Gelo baweriya raya giştî bi vê pêvajoyê dikare were sazkirin?”
‘Ev kiryar bandor li ser pêvajoyê dikin’
Gulistan Kiliç Koçyîgîtê destnîşan kir ku bi vî awayî baweriya civakê ji aştiyê nayê û wiha dirêjî da axaftina xwe: “Civak van hemû kiryaran dibîne û tomar dike. Ev hemû kiryar bandorê li ser pêvajoyê dikin. Bi zihniyeteke ku vê yekê paşguh dike, ne mimkûn e ku em di aştî û demokrasiyê de li vî welatî pêş bikevin. Pêdiviya bingehîn a hem aştî û hem jî demokrasiyê îro bidawîanîna girtinên neheq û neqanûnî ye. Ew serbestberdana girtiyên siyasî yên di zindanan de ye. Em dixwazin careke din li ber Wezareta Dadê diyar bikin ku em ê ji bo edaletê, ji bo serweriya hiqûqê û ji bo azadiya hevalên xwe têbikoşin. Em li hember vê zihniyeta bêqanûn bêdeng nebûn. Em dibêjin ku em ê di pêşerojê de qet bêdeng nemînin.”
Seazî Temelî jî bi lêv kir ku ew li dijî komployê ne û wiha got: “Em li bendê ne ku Wezareta Dadê dawî li vê komployê bîne û îtîrazên xwe vekişîne. Em qebûl nakin ku pêvajoya danûstandinan, ku me di pêvajoya aştiyê de bi fedakarî û berpirsiyariyeke mezin pêk aniye, ji aliyê Wezareta Dadê ve were jehrîkirin. Divê wezîrê dadê tavilê vê îtîrazê vekişîne.”
Piştî daxuyaniyê parlamenterên DEM Partiyê derbasî lijneya giştî bûn. Di lijneya giştî de jî wêneyên Figen Yuksekdag, Selahattîn Demirtaş û girtiyên Doza Kobanê hilgirtin û bi çepikan protesto kirin.
