Wan – Dengbêjê ciwan Kava Înal ku bi kilamên xwe dilê çalakvanên di nobeta li dijî hewldana qeyûm de cih digirt xweş dikir, got: “Ez kilamên xwe ji bo vîna xwe dibêjim û emê vîna xwe biparêzin.”
Gelê Wanê li dijî hewldana qeyûm a Şaredariya Bajarê Mezin a Wanê 5 rojan li pêş avahiya şaredariyê nobet girt. Piştî biryara 5emîn Dadgeha Cezayê Giran a Amedê ya derbarê hevşaredar Abdullah Zeydan de hatiye destpêkirin, gel 5 roj berê li pêş avahiyaşaredariyê kom bûn û dest bi nobetê kirin. Ji 7 salî heta 70 salî bi hezaran gelê Wanê li pêş şaredariyê nobet girtin ku qeyûm tayîn nekin. Lê tevî çalakiya gel jî dîsa serê sibê qeyûm tayîn kirin. Polîsan serê sibê bi ser avahiya şaredariyêde girt û 6 jê rojnameger zêdeyî 100 kesan binçav kirin. Di çalakiyên 5 rojan de dengbêjê ciwan Kava Înal jî di nava gel de cih girt û bi stranên xwe piştgirî da gel.
‘Ji zarokatiya xwe ve kilaman dibêje’
Dengbêjê ciwan Kava Înal ku 18 salî ye, ji navçeya Şaxê ya Wanê ye û ji zaroktiya xwe ve kilaman dibêje. Bav, dapîr, bapîr, di malbata Kava Înal de gelek dengbêj hene. Kava Înal jî ji wan hînî kilam gotinê bûye. Kava Înal, herî zêde ji Dengbêj Şakiro (Şakîr Denîz) hez dike û hemû kilamên Şakiro ji ber dizane. Kava Înal, ev 3 roj in di nobeta li dijî hewldana qeyûm de ye û kilamên xwe bi dengeke bilind dibêje.
‘Em naxwazin qeyûm tayînî vir bikin’
Kava Înal ê ku ji bo Ajansa Welat axivî, diyar kir ku ew naxwazin qeyûm tayînî li ser şaredariya wan bê kirin û got ku ew ji bo vîna xwe hatiye ber şaredariyê. Kava Înal, destnîşan kir ku ew naxwaze gelê Wanê tenê bihêle û got: “Em ji bo vîna xwe û gelê xwe li vir in. Em qeyûm naxwazin, şaredarî me bi dest xistiye. Ez kilamên xwe jî, ji bo vîna xwe, ji bo gelê xwe dibêjim. Gava ez kilaman dibêjim gelek kêfa milet jî bi min tê. Em aştiyê, aramiyê dixwazin. Em tiştên wiha qebûl nakin û qasî em sax bin, em ê ji bo gelê xwe bixebitin û em vîna xwe ji bo wan nahêlin.”
