Xizmên Windayan û rêveberên ÎHDa Amedê di hefteya 860î de li aqûbeta Muhyettîn Taşdemîr pirsîn. Kurê Muhyettîn Taşdemîr Nîhat Taşdemîr destnîşan kir ku ew şahid e ku bavê wî ji aliyê polîsan ve hatiye şopandtin û revandin.
Xizmên Windayan û rêveberên Komeleya Mafên Mirovan (ÎHD) a Amedê di hefteya 860î de çalakiya “Bila winda bên dîtin û kujerên wan bên darizandin” li ber Bîrdariya Jiyanê ya Parka Koşûyolê ya Rêzan li dar xist. Di çalakiyê de xizmên windayan, rêveberên ÎHDê, nûnerên rêxisinên sivîl amade bûn. Xizmên windayan li aqûbeta Muhyettîn Taşdemîr pirsîn û wêneyên wan hildan. Endama Komîsyona Windayan Parêzer Berfîn Çelîk, metna çapemeniyê ku ji aliyê kurê Muhyettîn Taşdemîr, Nîhat Taşdemîr ve hatibû nivîsandin xwend û got: “Malbata me li bajaroka Konutbeklera Mûşê dijî. Di 5ê Tebaxa 1993an de, li derdora saet 21:30an de 5-6 kesan bi cil û bergên sivîl, bi doçka û çekên lûle dirêj hatin gundê me. Ji kesên di vê komê de yek kete mala me. Yên din jî li ber bavê min sekinin. Yê ku li ber deriyê mala me rawestiya, Muhyettin Taştekin, birin baxçeyê malê. Piştî ku bavê min ji malê derxistin, me dengê çekan bihîst. Piştî ku dengê çekan rawestiya, dema em derketin derve, min dît ku bavê min li bexçe di nava xwînê de ye. Koma çekdar ber bi fermandariya alaya cendirmeyan ve reviyan. Dûrahiya di navbera malê û fermandariya alayê de bi qasî 800 metre ye. Beriya vê bûyerê me dizanîbû ku bavê min ji aliyê polîsên cilûbergên sivîl ve tê şopandin. Bavê min li derdorê kesayeteke naskirî û bibandor bû.”
‘Ez şahid im’
Berfîn Çelîk, di berdewama daxuyaniyê de bal kişand ser îftirayên polîsan ên der barê kuştîna Muhyettîn Taşdemîr ku avêtibûn stuyê PKKê û wiha lê zêde kir: “Di sala 1990î de çû Ewropayê û li wir di siyaseta demokratîk a Kurd de cih girt. Berî ku were kuştin demek kin çûbû Almanya û Fransayê. Mehek piştî vegera gund hat darvekirin. Ez bûm şahid. Min bi xwe şahidî kir ku bavê min ji aliyê polîsên cilûbergên sivîl ve hatiye şopandin û piştre hat kuştin. Du roj piştî kuştina bavê min, televizyona TRT ragihand ku ev bûyer ji aliyê PKKê ve hatiye kirin. Lê piştre PKKê ragihand ku tu têkiliya wan bi vê bûyerê re nîne. Piştî kuştina bavê min pêvajoyeke darazê ya bi rêk û pêk nehat kirin.
‘Em ê daxwaza edaletê bikin’
Berfîn Çelîk, di dawiya axaftina xwe de wiha got: “Tevî ku me serî li hemû saziyên pêwendîdar da jî, me nekarî ti encamekê bi dest bixin. Ev hemû tiştên ku kurê Taştekîn eşkere kir, nîşan dide ku ji bo ronîkirina bûyerê û tespîtkirina berpirsyaran pêvajoyeke darazê ya bi bandor nehatiye meşandin. Weke parêzvanên mafên mirovan çend sal jî derbas bibin em ê ji bo Muhyettîn Taştekîn û hemû windayan edaletê bixwazin.”
Daxuyanî piştî çalakiya rûniştinê bi dawî bû.
