Berdevkê Ragihandinê yê HSDê Ferhad Şamî diyar kir ku Fermandarê Giştî yê HSDê Mazlum Ebdî dê beriya serê salê biçe serdana Şamê.
Berdevkê Ragihandinê yê Hêzên Sûriyeya Demokratîk (HSD) Ferhad Şamî, ji televîzyona Al Arabiya ya navenda wê Erebistana Siûdî re axivî. Şamî têkildarî hevdîtinên di navbera Rêveberiya Xweser a Bakur û Rojhilatê Sûriyeyê û hikûmeta demkî ya Şamê de axivî.
Ebdî beriya sersalê diçe Şamê
Ferhad Şamî diyar kir ku dê Fermandarê Giştî yê HSDê Mazlum Ebdî beriya serê salê biçe serdana Şamê û di mijara entegrekirina HSDê ya di artêşa Sûriyeyê de hemfikir in û bi Şamê re xalên hevpar hene.
Şamî îdiayên li ser hin dezgehên çapemeniyê hatin weşandin ku dibêjin HSDê li eyaleta Suweydayê hêzên leşkerî yên Durzî perwerde kirine derewand û got: “Me hêzên Hîkmet El Hîcrî perwerde nekirine. Têkiliyên me yên bi gelê Durzî re hem siyasî hem jî di asta gel de ne. Tecrûbeyên wan ên leşkerî hene û pêwîstiya wan bi perwerdeya leşkerî ya HSDê nîn e.”
‘Tu têkiliyek me bi Îsraîlê re nîn e’
Şamî têkildarî îdiayên derheqê têkiliyên HSD û Îsraîlê de jî got: “Tu têkiliya me bi Îsraîlê re nînin. Heke têkilî bi Îsraîlê re hebûna dê tu kesî cisaret nekira êrişî HSDê bike. Yên van gotegotan belav dikin, ew kes in ên xwedî tu projeyeke neteweyî ya berfireh a Sûriyeyê nîn in.”
Ebdû: Danûstandinên me bi Şamê re qut nebûn
Fermandarê Giştî yê HSDê Mazlum Ebdî jî duh di civîna Şandeya Piştevaniya Muzakereyan a duh li Tebqayê hat lidarxistin de axivî û di heman çarçoveyê de axivîbû. Ebdî gotibû ku ew girêdayî Peymana 10ê Adarê ne û her çend car bi car binpêkirin çêbibin jî danûstandinên bi hikûmeta demkî re qut nebûne û ji bo pêşxistinê hewldanên wan hene.
