Girtiyên Apoyî êrişên li dijî Rêveberiya Xweser bi tundî şermezar kirin û anîn ziman ku li dijî hemû cureyên êrişan tekane rê berxwedan e û banga tevlêbûna seferberiyê kirin.
Di daxuyaniya li ser navê Girtiyên Apoyî yên li zindanên Tirkiye û Kurdistanê hate dayîn de banga berxwedanê hate kirin. Di daxuyaniyê de wiha hate gotin: “Bi rojan e li Heleb, Dêr Hafir û Tişrînê êriş li ser gelan tê meşandin. Di dema êrişên komkujiyê yên li dijî gelê me de netew dewletên kapitalîst xwe ker û lal dikin. Heman hêz rêya xwînmijên HTŞ, DAIŞ û Tirkiyeyê ku zarok û jinan di bin navê ‘terorîstiyê’ de qetil dikin, vedikin.”
‘Armanc Şoreşa Rojava ye’
Di daxuyaniyê de hate diyarkirin ku armanca esasî ya êrişan Şoreja Rojava û hişmendiya neteweya demokratîk a li Rojava hatiye avakirin e. Di daxuyaniyê de ev tişt hatin gotin: “Êrişan xwînmijên bi navê HTŞ û DAIŞê dikin lê li pişt wan Tirkiye û Qatar hene. Lê em van rûyên êrişkar ên bi maske baş nas dikin.”
‘Em ê mafê berxwedanê bi kar bînin’
Di daxuyaniyê de berxwedana gelê Kurd a 50 salên dawiyê hate bibîrxistin û wiha hate gotin: “Em ji kevneşopiya berxwedanê tên. Em bang li çeteyên xwînmij û xwediyên wan dikin: Ku ev pêvajo sabote bibe dê helwesta me di asteke gelek jor de pêş bikeve. Çewa rihê fedayî yê Kobanê azadî bi xwe re anî, berxwedana me jî dê serkeftinê bi xwe re bîne. Em dê heta dawiyê mafê xwe yê demokratîk ê berxwedanê bi kar bînin.”
Girtiyên Apoyî di daxuyaniyê de bang li gelê Kurd kirin ku rabe ser piyan û xwedî li destkeftiyên rojavayê Kurdistanê derkeve. Girtiyan xwest ku herkes tev li seferberiyê bibe û têkoşînê mezin bike.
