Hevdîtinên Amerîka û Îranê yên nukleere yên li Cenevreyê bidawî bûn. Piştî bidawîbûna danûstandinên sêyemîn yên di navbera Amerîka û Îranê hatine kirin her du alî daxuyandin ku dê hevdîtin bidomin.
Wezîrê Karên Derve yê Îranê li ser mijarê daxuyanî da ajansên Îranê. Nûnerên Amerîkayê jî rasterast daxuyanî nedan. Lê rayedarên ku navê xwe aşkera nekirin li ser hevditina aliyan agahî dan çapameniyê. Di agahiyên nûçeyên hatine parvekirin de hat gotin ku hevdîtin baş derbas bûye û dê hevdîtin li Viyanayê bidome.
Wezîrê Karên Derve yê Îranê Abbas Arakçî derbarê mijarê de daxuyanî da çapameniyê û di daxuyaniyê de diyar kir ku li ser hin mijaran gihiştine hin encaman. Li gor daxuyaniya Arakçî birya hatiye dayîn ku tîmên teknîkî dê roja Duşemê li Viyanayê dest bi xebatên teknîkî bikin da ku bigihîjin çarçove û pêşnûmayekê.
Di beşeke din a daxuyaniya xwe de, Arakçî behsa rakina ambargoyê kir û got: “Me daxwazên xwe yên derbarê rakirina ambargoyê de bi zelalî anîn ziman. Herwiha, tiştên ku em dixwazin pêk werin jî me gotûbêj kir.”
Arakçî destnîşan kir ku civînên teknîkî dê roja Duşemê li Ajansa Enerjiya Atomî ya Navneteweyî dest pê bikin. Hat diyarkirin ku hevdîtina çaremîn dê hefteya pêş pêk were.
