Şaredariyên li Amedê û Weşanxaneya Vate bi minasebeta 21ê Sibatê Roja Zimanê Dayikê ya Cîhanê şahiyek bi konser li dar xistin. Beriya konsere Hevşaredara Amedê Serrra Bucak diyar kir ku ew ê her tim ji bo zimanê kurdî xwe perpirsiyar bibînin û têbikoşin.
Weşanxaneya Vate û şaredariyên li Amedê bi boneya 21ê Sibatê Roja Zimanê Dayikê yê Cîhanê li Çand Amedê şahiya “Şeva Kirmanckî” li dar xistin. Beriya şahiyê resepsiyon amade kirin. Hevşaredarên şaredariyên li Amedê, nivîskar, helbestvan û hunermend û welatî beşdarî şahiyê bûn.
‘Zaravayên kurdî bi êriş û qedexeyan re rû bi rû dimîne’
Di resepsiyonê de axaftin hatin kirin. Hevaredara Bajarê Mezin a Amedê Serra Bucak axivî û bal kişand ser girîngiya zimanê dayikê û got: “Zaravayên kurdî bi êriş û qedexeyan re rû bi rû dimîne. Armanca me ew e ku zimanê me winda nebe. Em ê her tim ji bo zimanê kurdî xwe perpirsiyar bibînin û em ê têbikoşin. Ji bo ziman çi xebat bên kirin em ê piştgiriyê bidin. Divê hemû kes ji bo ku zimanê me bibe zimanê jiyanê xwe berpirsiyar bibine. Divê zimanê kurdî bibe zimanê perwerdehiyê û fermî.”
Nivîskar Malmisanij jî bi zaravayê Kirmanckî axivî û bal kişand ser girîngiya ziman û wateya 21ê Sibatê.
Piştî resepsiyonê li eywana mezin şahî li darxistin. Hevseroka Partiya Heremên Demokratîk (DBP) Çîgdem Kiliç Uçar, Parlementera DEM Partiyê ya Mêrdînê Salîha Aydenîz, Hevşaredara Bajarê Mezin a Amedê Serra Bûcak û gelek welatî tevlî bernameyê bûn. Beriya ku stranbêj derkevin ser dike, pêşî sînevîzyona têkildarî jiyana mamoste û zimanzanên ku ked dane zaravayê Kirmanckî dan pêşandan. Seroka Daîreya Karên Çandê ya Şaredariya Bajarê Mezin a Amedê Zeynep Yaş derket ser dike û li ser girîngiya rojê axivî.
Paşê jî stranbêj Celo Boluz, Derya Cengîz, Eylul Nazlier, Xoser Rayîrwan, Wusar derketin ser dike û stranên bi zaravayê Kirmanckî gotin. Helbestvan Bedrîye Topaç, Omer Barasî, Îdrîs Yazar û Mem Keleş Çiçek jî derketin ser dike û helbestên Kirmanckî xwendin.
