Li bajarê Munîh ê Almanyayê, li banliyoyeke herêma Parîs a Fransayê û paytexta Amerîkayê Washingtonê li dijî êrişên li ser Rojava çalakî hatin lidarxistin. Di çalakiyan de bang li cîhana navneteweyî hate kirin ku piştgirî bidin dengê Rojava.
Li gorî nûçeya Ajansa Nûçeyan a Firatê (ANF), li bajarê Munîhê duh li qada Zanîngeha Geschwesterscholl ji bo piştevaniya bi Rojava re mîtîngek hate lidarxistin.Ji her çar parçeyan Kurdistanî û dostên wan ên Elman tevlî çalakiyê bûn û nerazîbûn nîşanî êrîşan dan.
Di mitîngê de hate xwestin ku êrişên li ser gelê Kurd bên rawestandin û destkeftiyên li Rojava bên parastin. Di tevahiya çalakiyê de peyamên piştevaniya bi gelê Rojava re hatin dayîn û bang hate kirin ku tu kes li hemberî van êrîşan bêdeng nemîne. Çalakvanan diyar kir ku ew ê têkoşîna li dijî êrîşên li ser Rojava mezin bikin û piştevaniyê bidomînin.
Her wiha ji bo meşa mezin a ku wê 24ê Çileyê roja Şemiyê were lidarxistin, banga tevlibûnê hate kirin.
Li Parîsê piştevanî ji bo Rojava
Li herêma Saint-Genevieve ya paytexta Fransa Parîsê ji bo piştevaniya bi Rojava re meşek hate lidarxistin û gelek kes beşdarî meşê bûn. Meş li ber Lokantaya Mani bi mîtîngê bi dawî bû.
Di axaftinan de hate destnîşankirin ku Rojava ji bo mirovahiyê hêviyeke hevpar e û hate diyarkirin ku divê statuya azad û xweser a Rojava were naskirin. Di çalakiyê de bê navber dirûşmeyên weke “Yek e yek e yek e, gelê Kurd yek e” û “Rojava Rojhilat e, Kurdistan yek welat e” hatin berzkirin.
Li Washingtonê dostên Kurdan seferber bûn
Li paytexta Amerîkayê Washington Kurd û dostên wan ji bo Rojava seferber bûn û bang li senato û hikûmetê kirin ku li dijî êrişên li ser Rojava rawestin.
