Şirnex – Jinên ku li navçeya Silopiya ya Şirnexê ji bo aqûbeta mirina Rojîn Kabaîşê bê zelalkirin daxuyanî dan wiha gotin: “Îro derketiye holê ku DNA ya 2 kesan li ser laşê Rojînê hatiye dîtin. Ev jî tê wê wateyê ku rayedar hin tiştan vedişêrin.”
Jinan li Kolana Hunerê ya navçeya Silopiya ya Şirnexê ji bo Xwendekara Zanîngeha Yuzuncu Yilê ya Wanê Rojîn Kabaîş a ku di 27ê îlona 2024an de winda bû û cenazeyê wê piştî 18 rojan hat dîtin daxuyanî dan çapemeniyê. Parlementera DEM Partiyê ya Şirnexê Newroz Ûysal Aslan, endamên partiyên siyasî û saziyên civaka sivîl, endamên Tevgera Jinên Azad (TJA) û Meclîsa Dayîkên Aştiyê tev li daxuyaniyê bûn. Di daxuyaniyê de pankarta li ser, “Kujer diyar in, edalet li ku ye” dinivîsî hat vekirin. Berdevka TJAyê ya Şirnexê Nafiye Geçgel daxuyanî xwend û anî ziman ku ev saleke ew dipirsin ku çi bi serê Rojîn Kabaîşê hat.
‘Li hember qêrîna me dozgerî bêdeng ma’
Geçgel bertek nîşanî rayedarên dewletê da û wiha domand: “Li hember qêrîna me ya ji bo Rojînê dozgerî bêdeng dima. Lêkolîn li ser mirina wê nekirin û dereng hiştin. Îro derketiye holê ku DNA ya 2 kesan li ser laşê Rojînê hatiye dîtin. Ev jî tê wê wateyê ku rayedar hin tiştan vedişêrin.”
‘ATKê û Dozgeriya Wanê mirina Rojînê di tarîtiyê de hiştin
Piştî Geçgel Parlementer Newroz Ûysal Aslan jî bi bîr xist ku rayedaran destpêkê digotin Rojînê întîxar kiriye û wiha got: “Ev saleke Saziya Tiba Edlî (ATK) ya Wanê û Dozgeriya Wanê rastiya mirina Rojînê di taritiyê de hiştin. Aqilê ku li hember jinên Kurd tundiyê pêk tîne îro li Wanê li ser kar e. Ev şopên li ser bedena Rojînê derketîne yên kê ne? Divê were aşkerekirin. Heya ku aqubeta mirina Rojînê zelal nebe û kujer hesabê nedin em ê li ser piyan bin. Em ê tekoşîna xwe berdewam bikin.”