Hemserekê DEM Partî yê Pêroyî Tuncer Bakirhan beşdarê panelê ciwanan ê Amedî bi û wina vat: “Eger ciwanî nê prosesî rê wayîr vejîyê, ma eşkenê komel û welatêko demokratîk awan bikerê.”
Piştevanîya Wendekaranê Azadan ê Dîjleyî çarçewaya “Vengdayîşê Aştî û Komelo Demokratîk” yê Rayberê Şarê Kurdî Abdullah Ocalan de awanîya Tîyatroyê Şaristanî yê Amedî de bi sloganî “Beşdar be, muqaneşa bike, bivurne” panelêk organîze kerd. Hemserekê Partîya Têduştî û Demokrasîyî ya Şaran yê Pêroyî (DEM Partî) Tuncer Bakirhan, endam û rayberê DEM Partî û zaf wendekarî beşdarê panelî bîyî.
Tuncer Bakirhan dîyar kerd ke partîya înan partîyêka ciwanan a û va ke partîyê ke ciwanî tede bibê, her çend hêrişî zî bibê payra manenê û xo domnenê. Tuncer Bakirhan dîyar kerd ke heme sîstemî ke ciwanî tede çin ê, bi têkşîyayîşî reyde rî bi rî manenê û behsê muhîmîya rol û mîsyonê ciwanan kerd.
‘Hêdî hêdî sîstemê yewperestî qedîyenê’
Tuncer Bakirhan da zanayene ke dinya de zaf krîzê aborî est ê û vat ke hêzê hegemonî ke wayîrê rayirê bazirganî benê, şer vejenê. Tuncer Bakirhan îfade kerd ke tewrê krîz û têmîyanekîye ke est ê zî hêvîya înan xurt a û wina vat: “Ma zî hewl danê ke kesê ke hêvî danê, ma hetê înan de vinderê. Hetê ma de sîstemê neweyî yenê awankerdene. Hêdî hêdî sîstemê yewperestî qedîyenê. Dewletê ke bi hewayêko têduştî nêzdîyê komelê xo bê, bin nêkewenê. Vengdayîşê rêzdar Abdullah Ocalan zî nê çîyî ser o yo. Rêzdar Ocalan no çî dî.”
‘Berpirsîyarîya ma zaf girde ya’
Tuncer Bakirhan dîyar kerd ke vengdayîşê 27ê Sibate destpêkê prosesêko newe yo û wina vat: “Vengdayîşê 27ê sibate tarîxê şarê kurd û tirk ê hezaran serran zî verçimanê xo de gêno. Rêzdar Ocalan îşaret keno ke sey Dêsê Berlînî, dêso ke şaran mabênê şaran de yo, rijîyayo. Tîya de wezîfeyêka girde û berpirsîyarîyêka girde kewena mile ma ser o. Eger ciwanî wendişê xo reyde wayîrê nê prosesî vejîyê, ma eşkenê komel û welatêko demokratîk awan bikerî ke şarê kurd û elewî tede nêrê çinhesibnayene. Berpirsîyarîya ma zaf girde ya. Tirkîya de ciwanî sey xeterî ameyî vînayene. Wa ciwanî polîtîk mebê zaf polîtîkayê qilêrinî ciwanan ser o ameyî kerdene. Kemal Kurkut, Şerzan Kurt û zaf ciwanê bînî bîyî qurbanê nê polîtîkayan. Nê prosesî de verê cû ganî ciwanî berpirsîyarî bigîrê. Bê ke goşê xo bidê vatişê derûdorî, ganî seba ke sîyasetê Tirkîya bivurnê, bikewê miyanê têgêrayîşî. Terso tewr gird ê sîsteman azadbîyayîş û demokratîkbîyayîş o. 600-700 hezar wendekarî mecbur mendî ke zanîngehanê xo ra fek verabidê. La manaya dîplomayan zî nêmenda. Seba Tirkîya de awankerdişê bingehêka demokratîke ganî ma têkoşîn bikê. Vengdayîşê aştî û komelo demokratîk tena seba kurdan nê, seba 85 mîlyon kesan azadîye wazeno, vernîya ciwanan akeno. Ma bawer kenî ke ma do serkewê.”
