Çi ceza nêeşkeno ma dewaya ziwanê ma ra dûrî bifîno

Komîsyonê Ziwan, Kultur û Hunerî yê DEM Partîyê hêrişê ziwanê kurdkî ser hesabê xo yê Xî beyanetêk da û beyanet de ame vatiş ke ê sey DEM Partîye do bingeyê polîtîkayanê zafziwanî û zafkulturî de xoverdayîşê xo her ca û her wextî de dewam bikerê, çi ceza nêeşkeno ma dewaya ziwanê ma ra dûrî bifîno.

Komîsyonê Ziwan, Kultur û Hunerî yê DEM Partîyê hêrişê ziwanê kurdkî ser hesabê xo yê Xî beyanetêk da.

Beyanat wina yo: “Hêriş û zordarîyê ziwanê kurdkî ser o bi hawayêko bêmabeyn dewam kenê. Nê rojanê peyênan de nê hêrişê bêqanûnî yenê rayîrberdene. Seke nimûne; seba Hunermend Kasim Taşdoganî semedê ke deyîrê kurdkî vatê 30 aşmî ceza, seba Hunermend Mazlûm Jînda reyna seba ke deyîrê kurdkî vatê 22 aşmî ceza ameyê birnayene. Polîsan hêrîş berd Komeleya Edebîyatkaranê Kurdan ser û kitab û rojnameyî desteser kerdî. Akademîsyena Beşê Ziwan û Edebîyatê Kurdkî yê Unîversîteya Mûş Alparslanî semedê ke kitabê kurdkî bi wendekaranê xo dayê wendene ameye îxrackerdene. La belê nê derheqê nê kitaban de çi qedexe yan jî çi tehqîqat çin o. Tewr peynî de zî şanoger û kaybaz Cûma Xelîl Îbrahîm yo ke bi nameyê Bavê Teyar hişê şarê kurdî de cayêko pîroz girewto semedê hêrîşanê Tirkîya de Awbendê Tişrînî de ame qetilkerdene.

Ma zanê ke nê polîtîkayê çinkerdişî se ser verê ney ameyî sîstematîzekerdene û ewro zî hetê desthilatdarîye ra yenê rayîrberdene. La belê şarê Kurdî hemverê nê polîtîkayan de seba azadîya ziwan, kultur û heme erjeyanê xo yê kurdewarî xo ver dayo û xoverdayîşê xo hîra kerdo. Ewro bi milyonan Kurdî seba pawitene, averberdene û azadîya ziwanê kurdkî xo ver dano.

Ma zî sey DEM Partîye do bingeyê polîtîkayanê zafziwanî û zafkulturî de xoverdayîşê xo her ca û her wextî de dewam bikerê. Hemverê nê bireyanê bêqanûnîyan de ma do kaleka yewbînan de paştî bidê xoverdayîşî. Çi ceza nêeşkeno ma dewaya ziwanê ma ra dûrî bifîno. Seke Bavê Teyarî zî vat ‘ma mergî ra nêtersenê’ û ma do seba azadîye xoverdayîşê xo her wextî ra vêşêrî xurt bikerê.”