Rayberê ZIMAN-DER’î yê Colemêrgî bi munasebetê 15ê Gulane Roşanê Ziwanê Kurdkî vengdayîşê wayîrvejîyayîşî seba şarî kerd û dîyar kerd ke ê do 15ê gulane de rayîrşîyayîşêko girseyî virazê.
Kovara Hawarî 15ê Gulane 1932î de hetê Celadet Elî Bedîrxanî ra Şam de ameya weşanayene. Kovara Hawarî tarîxê kurdan de kovara yewin a ke bi herfanê latînî ameya nuştiş. Bi munasebetê serrgêra weşanayîşê Kovara Hawarî, serra 2026î de 15ê Gulane sey Roşanê Ziwanê Kurdkî ame îlankerdene. Serra 2006î ra nat her serre çar hetanê Kurdîstanî û teberê welatî de kurdî na roje bi heyecanêko gird pîroz kenê. Emser zî amedekarîyanê pîrozkerdişê 15ê Gulane dest pêkerd. Sey her şaristanê Kurdîstanî, Colemêrg de zî bi pêşengîya sazgehanê ziwanî, Roşanê Ziwanê Kurdkî do bi programanê cîyayan bêro pîrozkerdene.
‘Ma mîyanê aşmêk de awanîya xo amade kerd’
Hemsereka ZIMAN-DER’î Esmer Tekîn bale ante muhîmîya xebatanê ziwanî yê şaristanî ser o û dîyar kerd ke sazgehê înan verê amebi girewtene û venganîyêka girde mîyanê şarî de virazîyabî û qiseykerdişê xo domna: “No 5 aşmî yo ma bê ca xebatê xo rayra benê. Dima ra ma bi keda şarê xo awanîyêk dî û ma bi xo pak kerd. Mîyanê aşmêk de ma sazgehê xo amade kerd û muracatê xo yê fermî kerd û nika zî 2 sinifê ma û 70 wendekarê ma est ê.”
‘Wa şarê ma yê Colemêrgî wayîrê ziwanê xo vejîyo’
Esmer Tekîn veng da dayîk, ciwan û wendekaran û vat: “Vengdayîşê mi her kesî ra ver dayîkan rê yo. Wa şarê ma yê Colemergî wayîrê ziwan, kultur û estbîyayîşê xo vejîyo. Estbîyayîşê ma ziwanê ma yo.”
15ê Gulane de rayîrşîyayîşo girseyî
Hemserekê ZIMAN-DER’î Naîf Beyterî zî bale ante manayê 15ê Gulane ser o û dîyar kerd ke na roje seba şarê kurdî sey netewe rojêka bi qedr û qîmet a û wina vat: “Seba 15ê Gulane amadekarîyê ma temam ê. Ma do vernîya nêweşxaneyê dewlete de bi hawayêko girseyî kom bibê û heta mîyanê suke rayra şêrê. Badê eşkerayî, ma do derbasê Kent Parkî bibê.”
‘Ma do bi govende û deyîran 15ê Gulane pîroz bikerê’
Naîf Beyterî dîyar kerd ke ê do parke de bi cil û berganê neteweyî, govende, deyîran û dengbejî kulturê xo pîroz bikerê û veng da heme welatijan ke tewrê şayîya înan bibê û wayîrê ziwanê xo vejîyê.
