Dewa Çemkayî ya Colemêrgî welatijanê dewe vera xebatanê gêrayîşê madenan çalakî daye destpêkerdene û da zanayene ke do destûr nêdî ke xozaya înan bêra talankerdene.
Şîrketê Madenî yê Meskan Olmezî 5 serran ra vêşêr o ke dewa Çemkayî ya Colemêrgî de xebatanê gêrayîşê madenan keno. Dewijanê dewa Çemkayî vera xebatanê gêrayîşî madenan vizêr çalakîya xo daye datpêkerdene. Çalakî roja diyîne de dewam kena. Dewijanê dewe derheqê çalakîya xo de qisey kerd û vat ke heta sehayê madenan bêrê girewtene, do çalakîya xo bidomnê.
Welatijan ra Harun Ecer dîyar kerd ke xozaya înan parçeyêkê cuya înan a û wina vat: “Ma nêbîyê parçeyêkê ferasetê rantî yê sîstema kapîtalîst û do ma nêbî zî. Nika koyê ma yenê talankerdene û awa ke ma şimenê, bîya jehr. Bi hezaran darê ma ameyê birnayene û xozaya ma qule kerda. Ma seba pawitişê xozaya xo xover danê. Heta ke no talan bêro vindarnayene, do çalakîya ma dewam bikera.”
‘Wa îşxalkerdiş û talan biqedîyo’
Abdurrahman Ecer zî îfade kerd ke ê do nêverdê xozaya înan bêra talankerdene û wina vat: “Seba ke qirkerdişê xozaya me bêro vindarnayene, ma na çalakî kenê. Wa destanê xo dewa ma ra biancê. Wa nê qirkerdişî biqedinê. No îşxalkerîye yo. Wa na îşxalkerî û talan biqedîyo. Êdî tu debarê dewa ma çin o, ma nêeşkenê bizan miqate bikerê. Nêverdanê ma şêrê koyanê xo. Wazenê ma herra xo ra fek veradê. La ma tîya de yê û do têkoşînê ma do bidomîyo.”
