Dayîkê Aştî ke beşdarê konferansê xo yê 3. bîyê, dîyar kerd ke ê wazenê Rayberê Şarê Kurdî Abdullah Ocalan êdî bireso azadîya xo ya fîzîkî û vat ê êdî wazenê şarê Kurdî welatêko azad de biciwîyo.
Meclîsê Dayîkanê Aştî, 12 serrî ra pey konferansê xo yê 3. kerd. Konferans bi sloganê “Dayîkî pêşengê komelê demokratîk û yê aştîya domdar ê” mabênê 18 û 19ê teşrîna verêne de Salona Sînemayî ya ÇandAmedî de ame kerdene. Heme Vakurê Kurdîstan û xeylê şaristananê Tirkîya ra dayîkî beşdarê konferansî bîyê. Konferansî de di rojî erjnayîşî û pêşnîyazî azadîya fîzîkî ya Rayberê Şarê Kurdî Abdullah Ocalanî, averberdişê prosesê “Aştî û Komelê Demokratîkî” ser o ameyê kerdene. Konferans bi encamnameyêk qedîya.
Dayîkê Aştî yê ke beşdarê konferansî bîyê Ajansê ma rê qisey kerd û dîyar kerd ke ê êdî serekêk û welatêko azad wazenê.
Dayîkê Aştî Perîxan Altug a ke Nisêbînî ra beşdarê konferansî bîye, Şemsa Bagdu ya ke Edene ra beşdar bîye, Emîne Eren û Tenzîle Baydar ê ke Mersîn ra beşdarê konferansî bîye, his û ewnîyayîşê xo ajansê ma reyde pare kerdê.
Kilîdê aştî wazeno qefleyê şerî bigîro
Dayîkan dîyar kerd ke ê êdî resayê a qonaxe ke ganî Rayberê Şarê Kurdî Abdullah Ocalan bireso azadîya xo ya fîzîkî, heme heqê Kurdan bêrê şinasnayene û şer biqedîyo û êdî aştî, azadîye û komelêko demokratîk sermîyan bibo. Dayîkan dîyar kerd ke ê êdî serekêk û welatêko azad û zimanêko serbest wazenê. Dayîkan îfade kerd ke Rayberê Şarê Kurdî Abdullah Ocalan seba caardişê aştî heme dinya rê kilîd o û ê wazenê êdî kilîdê aştî qefleyê şerî bigîro.
