Qezaya Elkê ya Şirnexî de tezîyeya endamê PKK’yî Kadrî Olaş ke 5ê hezîrana 2017î de şer de cuya xo vîndî kerda, bi girseyî ameye zîyaretkerdene.
Merkezê Resnayîş û Çapemenîyî yê Hêzanê Pawitişê Şarî (HPG-NRÇ) 22ê temmuze de dîyar kerd ke endamê înan Kadrî Olaş (Munzur Mordem) 5ê hezîrana 2017î de têkoşînê Herêmanê Pawitişî yê Medya de cuya xo vîndî kerda. Nê ser o keyeyê Kadrî Olaşî Elkê de tezîye ronaye. Endam û rayberê DEM Partî û DBP’yî yê Şirnex û qezayê ci, Botan TUHA-DER, Dayîkê Aştî, aktîvîstê TJA’yî pêşengîya Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) ya Şirnexî de tezîyeya Kadrî Olaşî zîyaret kerd. Girseyo ke merkezê qeza de kom bi, bi vatişê sloganî “Şehîd Namirin” heta keyeyê Kadrî Olaşî ke tede tezîye ameya ronaye, rayra şîyê.
‘Şehîdan rê wayîrvejîyayîş prosesî rê wayîrvejîyayîş o’
Tezîyeya de ke taxa Karşiyaka de ameye ronayene, ewilî seba cangorîyanê demokrasî û azadîye rêze ameye girewtene û dima Hemserekê DEM Partî yê Şirnexî Ramazan Uysal qisey kerd. Ramazan Uysalî dîyar kerd ê ewro bi saya cangorîyanê Têgêrayîşê Azadîye resayî na qonaxa Aştî û Komelê Demokratîkî. Ramazan Uysal vengdayîşê Rayberê Şarê Kurdî Abdullah Ocalanî yê 27ê sibate ard vîr û wina vat: “Şehîdan rê wayîrvejîyayîş prosesî rê wayîrvejîyayîş o. Reyna proses çend aver şêro, do hende xeyalê cangorîyan bêrê ca.”
Qiseykerdişan ra pey seba Olaşî mewlud ame wendene û zîyaretê tezîye qedîyayê.
