Partîya Demokrat a Kurdîstanî ya Îranî eşkera kerd ke endamê heyetê Îranî yê muzekkereyan Mihemed Ceferî Sahraroudî kiştoxê Qasimlo yo û derheqê ey de qerarê girewtene yê mîyanneteweyî est o.
Partîya Demokrat a Kurdîstanî ya Îranî (PDKÎ), derheqê muzekkereyê ke paytextê Pakîstanî Îslamabad de mabênê DYA û Îranî de dest pêkerd, eşkerayîyêk vila kerde û reaksîyon mojna. PDKÎ hişyarî da û vat ganî pêvînayîşî sey gamêka ver bi aştîye nêrê dîyayene û bale ante serê nasnameyê heyetê Îranî.
‘Heyetê Îranî nîşaneyê sîstemê mîlîtarîstî yo’
PDKÎ eşkerayî xo de dîyar kerd ke pêameyê heyetê Îranî karekterê rastîken ê rejîmî mojneno. Eşkerayî de ame vatene ke serekîya heyetî hetê Mihemed Baqir Qalîbaf ra yeno kerdene ke ey kesê nêzdîyê Supayê Pasdaran ê (IRGC) û programê nukleerî û fuzeyan de wayîrê rolêko merkezî yo.
‘Amadebîyayîşê kiştoxê Qasimlo heqaretê edaletî yo’
Yew madeya tewr baldarê yê eşkerayîya PDKÎ’yî tewrbîyayîşê Mihemed Ceferî Sahraroudî yo ke mîyanê heyetî de yo. PDKÎ dîyar kerd ke Sahraroudî rasterast bi suîqestê Dr. Ebdurehman Qasimlo ra eleqedar o û derheqê ey de qerarê girewtena mîyanneteweyî esto. PDKÎ’yî naye sey “heqeretêke ro heyetê Amerîka, qurbananê terorî û krîterê huqûqî” pênase kerd.
‘Muzekkere seba qezenckerdişê wextî yo’
PDKÎ’yî hişyarî da ke Komara Îslamî muzekkereyan seba çareserîya probleman ney, la seba qezenc kerdena wextî û xurtkerdişê polîtîkayanê xo yê bêîstîkraran” bikar ana. Eşkerayî de ame vatene ke têkilîya bi sîstemêko winayin ra beno sebebê meşrukerdişê terorîzmî û binpaykerdişê heqê merdiman.
Vengdayîş seba komelê mîyanneteweyî
PDKÎ’yî vengdayîşê komelê mîyanneteweyî û dewletanê demokratîk kerd ke mabênê şaranê Îran û Kurdîstanî û rejîmêko terorîst de weçînayîşê xo bikerê. PDKÎ’yî waşt ke berpirsê terorê dewlete bêrê muhakemekerdiş û destek bidê têkoşînê azadîya şarî.
