Koordînasyonê KJK’yî bi munasebetê 1ê Gulane mesajêk weşana û venga heme kesan da ke serra dîyîne ya Vengdayîşê Aştî û Komelê Demokratîkî de wayîrê nê vengdayîşê tarîxî vejîyê û waran bi coş pirr bikerê.
Eşkerayî de ame îfadekerdene ke 1ê Gulane tena rojêka pîrozkerdişî nîya, eynî wextî de “sozê awankerdişê cuya sosyalîst” o. Bale ancîya keda cinîyan ser o ke tarîxî de zaf ameya şuxulnayene û ame dîyarkerdene ke bê azadkerdişê cinîyan, azadîya kede mumkin nîya.
KJKyî mesajê xo de roşanê Rayberê Şarê Kurdî Abdullah Ocalanî pîroz kerd, ê karkeranê madenan ke Eskîşehîrî ra heta Anqara rayra şîyî, yê şarê Gimgim, Kanîreş û Gîresunî ke vera şîrketanê madenan herre û cuya xo pawenê û yê cinîyan pîroz kerd ke vera kiştişanê cinîyan payan ser o yê.
KJKyî dîyar kerd ke îqtîdarî xo sey patron û şarî zî sey karker û kole vînenê: “Sey kedkaran ma tena bi têkoşînê vera nê şeranê îqtîdarî eşkenê wayîrê keda xo bivejîyê. Çunke herre ked a, tarîx ked a, ziwan ked a.”
KJKyî vat ke ganî vera sîstemê kapîtalîstî bi sosyalîzmêka demokratîk û etîke têkoşîn bêro kerdene û wina domna: “Seke Rayberê Şarê Kurdî Abdullah Ocalanî zî vato, merdimîye de îsrar, sosyalîzmî de îsrar o.”
Eşkerayî de ame îfadekerdene ke şarê Kurdîstan û Rojhelatê Mîyanênî bi serran o kede xo ra dûrî kewtî û wina ame vatene: “Bê awankerdişê cuyêka azad û demokratîke, kede zî nêeşkena azad biba. Keda maye, keda cinîyan tewr zaf ameya şuxulnayene la hende zî pîroz a. Bê hewanayîşê sîstemê pederşahî, behsê azadîkerdişê kede nêbeno. Yanî bê azadîya cinîyan, cuye azade nêbena û bê azadîya cuye, kede zî azad nêbena.”
KJKyî peynî de dîyar kerd ke çimeyê heme problemanê kedkaran nêbîyayîşê demokrasî yo û têkoşînê seba ameyoxêko demokratîk zaf pîroz o û yeno a mana ke ma wayîrê keda xo vejîyenê.
