Şaredarîya Îdirî û Şaredarîya Xalfelî bi hemkarîya YEWKURD’î do mabênê 12 û 15ê hezîrane de bi sloganî “Cuye bi wendişî weş a” şaristanokê Xalfelî yê Îdirî de Rojê Kitaban ê Îdir-Xalfelîyî yê 1. organîze bikerê.
Şaredarîya Îdirî û Şaredarîya Şaristanokê Xalfelî yê Îdirî bi munasebetê wendişê kitaban aver berê û kitabanê weşanxaneyan biresnê wendoxan do mabênê 12 û 15ê hezîrane de bi sloganî “Cuye bi wendişî weş a” bi hemkarîya Yewîya Weşaneranê Kurdan (YEWKURD) Rojê Kitaban ê Îdir-Xalfelîyî yê 1. organîze bikerê. Do 17 weşanxane û xeylê nuştoxî beşdarê rojanê kitaban ke do 4 rojan Parka Kent Ormanî de bêro organîzekerdene. Rayberê YEWKURD’î Jêhat Rojhilat derheqê Rojê Kitaban ê Îdir-Xalfelîyî de qisey kerd.
Amanc resnayîşê kitaban o
Jêhat Rojhilat dîyar kerd ke bi amancê kitabanê Kurdkîyan biresnê şarî nê rojanê kitaban organîze kenê û wina vat: “Heta nika ma 5-6 cayan de na xebate kerde. Tewr peyên qezaya Erxenî û Amed de ma na xebate kerde. Riyê germê hamnanî ra do Rojê Kitaban ê Îdir-Xalfelî programê ma yo peyên bo. La mewsîmê payîzî de tayê xebatî vernîya ma de yê.”
‘Wazenê edebîyat, kultur û ziwanî zengîn bikerê’
Jêhat Rojhilat behsê amancê awankerdişê YEWKURD’î kerd û wina domna: “Ma zî waşt ma bêrê têhet û pers û problemê weşangerîya Kurdkî çî yê, ma senî eşkenê qada edebîyat, kultur û ziwanî Kurdkî zengîn bikerê, nînan ser o qisey bikerê. Bi nê amancî xebatê na komele aver benê.” Jêhat Rojhilat da zanayene ke kitabî ke Weşanxaneyanê Kurdkî ra vejîyenê, zafane yenê qedexekerdene û îfade kerd ke problem û astengîyanê winasînan reyde rî bi rî manenê.
‘Weşangeranê kurdan rê wayîr vejîyê’
Jêhat Rojhilat da zanayene ke reya ewil rojê kitaban şaristanokê Xalfelî de yeno organîzekerdene û wina vat: “Ma bawer î ke do eleqa vêşî ba. Şarê ma yê Xalfelî, Îdir û derûdorê ci ganî wayîrê nê rojanê kitaban vejîyê. Ma wazenê weşangeran û şarî, nuştoxan û şarî bîyarê têhet. Şar zî wa na bawerî de bo. Vengdayîşê ma o yo ke kultur, ziwan û tarîxê xo û Weşangeranê kurdan rê wayîr vejîyê; seba ameyoxo ke bi vîrêko komelkî û netewî bêro awankerdene. Na xebate do ameyoxî de seba kultur, ziwan û tarixê kurdkî ca cayê xo bigîra.”
