Vera projeyê JES’î ke qezaya Gimgimî de ameyo plankerdene, şarê Gimgimî reaksîyon dano mojnayene û vano: “JES bêro viraştene do jehrê ey sîrayetê awe bikero. Ma JES nêwazenê, heta ma ra bêro ma do seba pawitişê xoza û cuya xo têkoşîn bidê.”
Dewanê qezaya Gimgimî ya Mûşî de yeno waştene ke Projeyê Santralê Enerjî yê Jeotermalî (JES) bêrê viraştene. Şarê na herême zafê înan kurdê elewî yê û 16 dewan ra pê yena. Seba projeyê JES’î destûr û rizayê şarê herême nêameyo girewtene. Proje hetê komîsyonê şaristanî yê girêdayeyê walîtîyê Muşî ra dîyayo şîrketo anonîm ê IGNIS H2’î yê beradişê enerjî.
Şirket do aşma gulane de dest bi pirodayîşê sondajî bikero. Şarê herême nika ra vera talankerdişê xoza lingan ser o yo û têkoşînê xo roje bi roje aver beno. Seba muhîmîya babeta JES’î Gimgim ra Tekîn Akgul û Îmam Balseverî ajansê ma rê qisey kerd.
‘JES bêro ne malê ma maneno ne zî xozaya ma manena’
Tekîn Akgul bale ant serê projeyê JES’î û wina vat: “Ez 64 serrî ya, dewa Sofyan de cuyena. Dewa ma hewa û oksîjenê aye zaf rind o. Cuya ma îta de zaf bi konfor a, çike tîya ma her çîyê xo hêgayanê xo de ramenê û wenê. No JES bêro dewanê ma ne malê ma maneno, ne zî xozaya ma manena. Ma qicî ra heta pîl tîya de Jeotermal nêwazenê. Wa şîrketê Amerîka û xerîbî nêrê tîya.”
Tekîn Akgul qiseykerdişê xo de dîyar kerd ke no memleket, memleketê ma yo, ma memleketê xo veng nêkenê û wina vat: “Ma tîya de ameyê dinya, tîya de pîl bîyê û ma do tîya de zî bimirê. Mezelê pîlanê ma tîya de yê, cuya ma tîya de ya. Ma tîya teslîmî Amerîkaya emperyalîst û kolonyalîst nêkenê. Ma wazenê domanê ma tîya de bimanê û tîya de biciwîyê. Çimê ma zengînî, şîyayîşê Amerîka, Rojava û Ewropa de nîyo. Keyeyê ma herrin bibê zî ma rê weş ê. Ma kulturê xo tiya erd de nêverdanê, nêşinê.”
‘JES virazê jehr do sîrayetê awe bikero’
Varto ra Îmam Balsever zî bale ante JESê talankerdişê xoza yî ser o û vat: “Çi karê şîrketanê xerîban kewto welatê ma. Ma ra vanê welatê xo terk bikêrê. Ma senî nê welatî terk bikerî. Tîya de mal û milkê ma est o. Mîrasê kal û pîranê ma yo. Ma tîya de hêgayan ramenê, heywanan weye kenê. Nê JES’î virazê û zaf şêrî xorîn jehr do sîrayetê awe bikero. O wext zerar tena Varto rê nê, Mûş, Çewlig, Dêrsim û şaristanê ke nêzdîyê varto yê, do pêro tesîr bivînê. O semed ra no JES ma rê bi zerar o. Ma nê JES’î nêwazenê, heya ma ra bêro ma do tekoşîn bidê.”
