Şaredarîya Sûrî, qezaya xo de Merkezê Piştîdayîşê Cinîyan akerd.
Şaredarîya Sûrî ya Amedî, Kuçeyê Camîyî Kadî de Taxa Dabanogluyî de Merkezê Piştîdayîşê Psîkolojîk û Huqûqî yê Cinîyan akerd. Hemşaredara Sûrî Fatma Gulan Onkol akerdişê merkezî de qisey kerd û va ke ê tax û keyan de xebatî kerdê û resayê na netîce ke merkezî akerê.
Parlamentera DEM Partî ya Amedî Adalet Kaya zî dîyar kerd ke polîtîkayê şerî yê taybetî tewr zaf şar û cinîyanê kurdan ser o tesîr kenê û va: “Cayo ke tewr zaf tede na polîtîka yena kerdene, Sûr o. Sûr, seba Amedî hafizaya têkoşînî yo. Hafizaya kultur, ziwan, ked û nasnameyê ma yo. Înan waşt ke Sûrî ra însanan vejî. Amancê bîn yê nê polîtîkayan şuxulnayîşê nasname û bedenê cinîyan o. Coka ma vengdayîşê seserre vizêr Sûr de da. Badê serran mesajê rêzdar Abdullah Ocalanî ame parekerdene. Vizêr seba ma destpêkê cuyêka newe bi. Ganî ma cinîyî bibê pêşengê cuya newîye û berpirsîyarîyêka gird kewena milê ma ser o. Seba ke ma cinî paradîgmaya xo rêzdar Abdullah Ocalanî ra gênê.”
Hemşaredara DEM Partî ya Amedî Gulşen Ozer zî bale ant muhîmî û manaya Sûrî ser û va: “Ma cinî ganî Sûr newe ra awan bikê. Ganî ma cuya xo bi cuyêka kolektîf newe ra awan bikê.”
Badê qiseykerdişan, qurdele ameye birnayene û merkez abî.
