Rayberîya Dem Partî yê Qezaya Dortyolî derheqê hêrişanê Dewleta Tirke de ke Vakur û Rojhelatê Sûrîye ser o yê qisey kerd û wina vat: “Ganî bi ruhê Kobanê têkoşînêk bêro ramitene. Eke reyna ma wina rawirzê, ma do bieşkê vernîya nê şerî bigîrê.”
Hêrişê Dewleta Tirke û çeteyanê paramîlîter SMO’yî yê ke dew û bajaranê Vakur û Rojhelatê Sûrîye ser o yê dewam kenê. Hemserekê Pêroyî yê Partîya Têdûştî û Demokrasî ya Şaran (DEM Partî) Tulay Hatîmogullarî û Tuncer Bakirhanî, temsilkarê partîyanê sîyasîyan, sazîyanê sivîlan û zaf kesan vera hêrişanê ke Vakur û Rojhelatê Sûrîye ser o yê, 4ê çileyî de qezaya Samandaxî ya Hatayî û vera awanîya Dem Partî ya Hatayî de beyanat da û hemverê hêrişan de reaksîyon nîşan da. Hemserekê Dem Partî yê Dortyolî Hidir Sîmlî û rayberê DEM Partî yê Dortyolî Turan Suzen ke beşdarê nê beyanatî bîyî, derheqê hêrişanê Dewleta Tirke û çeteyan de ajansa ma rê qisey kerd.
‘Çira dinya vera nê heme sûcan bêveng a?’
Hidir Sîmlî dîyar kerd ke dewleta Tirk Vakur û Rojhelatê Sûrîye de şerêko lêmin kena û wina va: “Şerê ke Rojawanî de yo vera netewan yeno ramitene. Rojawanî de keda şarî est a. Des hezarî keynê û xortê Kurdan bîyî ax. Zafê înan derbeyî girewtî. Înan vengê merdimîye berz kerd. Tu heqê Tirkîya çin o ke hêrişê Rojawanî bikera. Bi teyareyan, ÎHA û SÎHAyan hêriş kena. Nê heme sûc ê, çira dinya vera naye bêveng a? Ma sey partî vera nê zilmî yê û ma do têkoşînê xo bidomnê.
‘Teyna no şar eşkeno nê şerî bido vindarnayene’
Hidir Sîmlî ard ziwan ke şarê Kurd, Tirk û Erebî ra bigîrê heta heme şaranê Kurdistanî ganî vera şero ke est o bêveng nêmanê û wina dewam kerd: “Serra 2014î de ma Cizîrî ra bigêrê heta Robarê Firatî merdiman zincîr viraştbî. Eke reyna ma wina rawirzê ma do bieşkê vernîya nê şerî bigîrê û bibê cewab. Teyna no şar eşkeno nê şerî bido vindarnayene.”
‘Bi aqlêko hempar û fikrêko komelkî Sûrîyaya demokratîke eşkena bêra awankerdene’
Hidir Sîmlî bale ant hêrişanê HTŞ yê ke vera komelê Elewîyan ê û qiseykerdişê xo wina qedêna: “Eke HTŞ statûyê Kurdan bigîro çiman ver û serek û rayberanê Elewîyan reyde qisey bikero, Sûrîyaya demokratîke bi aqlêko hempar, fikrêka komelkî Sûrîyaya demokratîke eşkena bêra awankerdene.”
‘Ganî vera çeteyanê dewleta Tirk têkoşînêk bêro dayene’
Rayberê DEM Partî yê Dortyolî Turan Suzenî zî dîyar kerd ke dewleta Tirk û grûbê paramîlîterî bi dişmenîyêka pîle hêrişê Vakur û Rojhelatê Sûrîye kenê û wina va: “Vera nê şerê lêminî têkoşînêko senîn eşkeno bêro kerdene? Ganî bi ruhê Kobanê têkoşînêk bêro kerdene. Şarê Kurd û dostê înan ganî vera hêrişanê dewleta Tirk û çeteyanê înan têkoşînêk bidê.”
Ganî şarî xo sist nêkerê, nêvajê do aştî biba. Ma vînenê ke pratîk de se kenê. Bi amancê îmhakerdişî hêrişan anê ma ser. Aştî wina nêbena. Rayîrêko aştî zî est o. Eke ez wazena to reyde wa û birayîye bikera, ganî ez goreyê rayîrî şêra. Yew hete ra vajê ma wa û birayê yewbînan ê û yewna hetî ra gulebaran bikerê, bombebaran bikerê, îmha bikerê. Ne aştîyêka winasîne bena ne bawerîya ma wa û birayîyêka winasîne yena.”
