Wendekarê Unîversîteya Dîcleyî vera hêrişanê taxanê Şêxmeqsûd û Eşrefîye eşkerayî daye û hêrişê taxan ser o şermezar kerdê.
Wendekarê Unîversîteya Dîcleyî vera hêrişanê taxanê Şêxmeqsûd û Eşrefîye waşt Fakulteya Huqûqî ra heta Fakulteya Fenî rayra şêrî. La polîsan wendekaran rê astengî vete û hêrişê wendekeran kerd û nêverda wendekarî rayîrşîyayîşê xo bikerê. Wendekarî demêko derg ra pey reyna kom bîyê û eşkerayî daye çapemenî. Wendekaran çalakî de pankartê, “ Êriş, Hovitî, Mirin. Em Rojava Tenê Nahêlin” girewt û sloganê “Bijî Berxwedana Rojava”, “Rojava Rojhilate Kurdîstan Yek Welat e” vatê. Wendekara Unîversîteya Dîcleyî Sîdar Kîye eşkerayî daye û hêrişê taxanê Helebî ser o şermezar kerdê û wina vat: “Ewro ma sey wendekarê Unîversîteya Dîcleyî tîya kom bîyê ke vengê xo hemverê qirkerdişê Rojava, kiştişê cinîyan û gedeyan berz bikerê. Ma vera hêrişanê Helebî tîya ra vengê xo berz kenê. La ewro tedaya ma yena kerdene. Ma tedaya ke ma rê yena kerdene qebul nêkenê. Rektor û rayberê Unîversîteyî zî parçeyê na teda yê. Unîversîte xoser a la tedayê ke ma rê yenê kerdene vera qanûnanê înan nîyê.
