Endama Meclîsa Dayikên Aştiyê Raîfe Ozbey têkildarî Konferansa Dayikên Aştiyê ya dê sibê li Amedê li dar bixin axivî û got: “Armanca me pêkanîna aştî, wekheviyê ye û bidawîkirina şer e.”
Meclîsa Dayîkên Aştîyê piştî 12 salan dê li avahiya ÇandAmedê ya Şaredariya Bajarê Mezin a Amedê di sibê ango 18ê Cotmehê saet 10.00an de bi şiyara “Dayik Pêşengên Civaka Demokratîk û Aştiya Mayînde ne” konferansek li dar bixin. Konferans dê 2 rojan berdewam bike. Endama Meclîsa Dayîkên Aştiyê ya Amedê Raîfe Ozbey derheqê konferansê de axivî û anî ziman ku mijara wan ya konferansê ya sereke aştiye û dixwazin şer bi dawî be.
‘Mijara me ya sereke aştî û azadî ye’
Raîfe Ozbey da zanîn ku ev 12 sal in konferans li dar nexistine û got: “Me mehek berê bi Dayikên Aştiyê re delegeyên xwe hilbijartin. Wê Dayikên Aştiyê yên li bakurê Kurdistanê û Tirkiyeyê tev li konseransê bibin. Em ê di konferansê de li ser pêvajoya Aştî û Civaka Demokratîk nîqaşan bikin. Em ê armanc û daxwazên xwe di konferansê de bînin ziman. Mijara me ya sereke jî aştî û azadî ye. Rol û rista dayikan di vê pêvajoyê de çi ye? Dayik divê çi bikin? Em ê werin li gel hev û van mijaran nîqaş bikin. Rêveber û nûnerên saziyên sivîl û demokratîk jî dê tev li konferansa me bibin û konferans dê 2 rojan berdewam bike.”
‘Xêrnexwaz bila pêvajoyê xera nekin’
Raîfe Ozbey bal kişand ser provokasyonên li dijî pêvajoyê û wiha got: “Armanca me pêkanîna aştî, wekheviyê ye û bidawîkirina şer e. Bila provakasyon çê nebin, xêrnexwaz bila pêvajoyê xera nekin. Çi ji destê me bê jî em ê bikin. Bila êdî li cihê çekan pênûs werin bikaranîn. Divê êdî deriyê girtîgehan bên vekirin û rêya serê çiya were vekirin. Êdî kuştin, zext û zordarî bila bi dawî bibin. Cîhan di meseleya Kurd de kerr û kor e, çima nizanin li ser rûyê cîhanê çend milyon Kurd dijîn. Mafê me jî heye, em jî mirov in. Bila em bên naskirin û tevahî gel jiyanek rehet bijî. Divê dest ji van provokasyonan bê berdan û ev gel jiyanek bi rûmet û bi hev re bijî. Li dijî van provokasyonan bila bisekinin û pêvajoyê bigihînin armanca wê.”
