Li ser zêdebûna berxwedana di çarçoveya seferberiya neteweyî de agirbest hate dirêjkirin. Rayedarên Rêveberiya Xweser têkildarî agirbestên xapînok ku hatin kirin, banga mezinkirin û berdewamkirina seferberiyê kirin. Gelê Rojava ku ligel hemû bêderfetiyan li aliyekê amadekariyên şerê gelê şoreşgerî didomînin û li aliyê din jî jiyana rojane rêxistin dike. Di bangawaziyan de hate xwestin ku dengê Rojava li çar hêlên cîhanê bê bilindkirin.
Di çarçoveya komploya navdewletî de êrişên li dijî Rojavayê Kurdistanê hefteyek li pey xwe hişt. Ligel hemû êrişên çeteyên HTŞê û DAIŞê yên girêdayî Tirkiyeyê gelê Kurd li çar aliyên Kurdistanê û tevahiya cîhanê tev li seferberiya neteweyî bû û dadikevin qadan û nerazîbûn nîşanî êrişan dide. Bi milyonan Kurdistanî û dostên wan li çar parçeyên Kurdistanê û derveyî welat rabûn ser pêyan. Her çiqas di encama berxwedana gelê Kurd de agirbest hatibe ragihandin jî rayedarên Rêveberiya Xweser û siyasetmedarên Kurd banga baldariyê hat.
Şero: Divê seferberî bê mezinkirin
Hevserokê Meclîsa Rêveber a Rêveberiya Xweser a Kantona Cizîrê Hesen Şero diyar kir ku tevahî sazî û dezgehên kantona Cizîrê di seferberiya xizmetguzariyê de ne. Têkildarî seferberiyê û berdewamiya debara jiyanê de Hesen Şero ji ANHAyê re axivî. Hesen Şero diyar kir ku wekî ku tê şopandin, ev çend roj in ku gel bi giştî, bi hêza xwe ya leşkerî û bi hêza xwe ya ewlekariyê li bajarê Qamişlo û Kantona Cizîrê di nava seferberiyê de ye û wiha got: “Tevahî sazî û dezgehên me yên Kantona Cizîrê heya niha di nava 24 saetan de, di milê xizmetguzeriyê de dixebitin. Da ku pêdiviyên şêniyan pêk bînin. Ev sazî bi gel re jî di nava serferberiyek mezin de ne. Saziyên me yên xizmetguzeriyê ji peydakirina nan, av, mazot, gazê û hwd di nava xebatê de ne.”
‘Yekîtiya derkete holê serkeftina herî mezin e’
Şero behsa berxwedan û piştevaniya her çarperçeyên Kurdistanê kir û wiha axivî: “Hesetên gelê me li her çar perçeyên Kurdistanê moral û serkeftin in. Morl û berxedana gelê Rojavayê Kurdistanê ji tevahî cîhanê re mînak e. Divê gelê parçeyên din jî her li pişt vê berxwedanê bin. Pêvajoya ku em tê re derbas dibin û berxwedana gelê Rojavayê Kurdistanê bi piştevaniya perçeyên din ên Kurdistanê destkeftiya herî mezin e. Bi yek rihî û dilî êdî berê xwe didin Rojavayê Kurdistanê, berê xwe didin cihê ku dijmin dixwaze hebûna gelê lê bide qirkirin. Bila gelê me di wê baweriyê de be ku serkeftina vî gelî wê dijmin têk bibin.”
Koçberî rewşa jiyan û mirovî jî dijwar kir
Bi deh hezaran malbatên koçber ên ji Efrîn, Şehba, Reqa, Tebqa, Dêrazorê û Şedadê ku hatine Kantona Cizîrê pêwistiyên wan ên mirovî û jiyanî jî tên dabînkirin. Tevî hewldanên Rêveberiya Xweser ji bo peydkirina pêdiviyên wan, hejmara mezin a mirovên koçber hişt ku komîteyên alîkariyê bangên lezgîn ji bo piştgiriya pêwîst bikin. Di heman demê de, gelê Rojava bi avakirina komîteyên parastinê li tax, gund, bajarok û bajaran, piştgiriya HSD û YPJê, parastina xwe xurt dike. Tevî dirêjkirina agirbestê jî, xeterî berdewam dike. Ji ber ku çeteyên HTŞê girbestên berê binpêkirin, baweriya rayedar û gelê Kurd bi agirbestê nîne. Ji ber vê yekê sazî û partiyên Rojava banga bilindkirina têkoşînê û xurtkirina hevgirtinê li Kurdistan û Ewropayê kirin.
Hewldana bicihanîna pêdiviyan didome
Ligel seferberiya giştî ya ku Rêveberiya Xweser li dijî êriş û gefên çeteyan ragihandiye, saziyên Rêveberiya Xweser ên li bajarê Hesekê ya Kantona Cizîrê pêşkêşkirina xizmetan didomînin. Saziya Avê ya Bajarê Hesekê dabînkirina avê bi rêya sarîcan ji şêniyan re zêdetir kirine. Ji rêveberên Saziya Avê ya bajarê Hesekê Hesen Izo Hisên ji ANHAyê re axivî û diyar kir ku ew bi rêya tankeran avê ji şêniyan re peyda dikin û got, beriya av li şêniyan were were belavkirin, av tê paqijkirin.
Li Hesekê amadekarî û hişyariyên ewlehiyê
Rêveberê Hêzên Ewlekariya Hundirîn a Hesekê Zurêr Miêş ji ANHAyê re axivî û derbarê rewşa bajar de agahî dan. Miêş diyar kir ku Hêzên Ewlekariya Hundirîn ji bo ewlehî û aramiyê li bajêr 24 saetan di rewşa amadebaşî û hişyariyê de ne. Miêş destnîşan kir ku Hesek aram e û wiha got: “Rewşa bajêr di bin kontrolê de ye. Şevê hin şaneyên veşartî hewl didin tevliheviyê derxin, lê demildest midahale tê kirin.” Miêş der barê tedbîrên ewlehiyê yên ku ji aliyê Hêzên Ewlekariya Hundirîn ve li bajêr hatine girtin hişyarî da û xwest ku gel jî di vî alî de hîstiyar be û alikariya hêzên ewlehiyê bike. Miêş anî ziman ku Hêzên Ewlekariya Hundirîn bi moralek bilind, fedakarî û baweriyek mezin, bi hevkariya şêniyên ku taxan diparêzin û Hêzên Parastina Civakê dixebitine.
Gel noqteyên parastinê ava kir
Li dijî êrişên çeteyan ligel hêzên ewlehiyê gel jî hişyar e. Ji ber xeteriya derketina şaneyên veşartî yên DAIŞê û îstîxbarata Tirk gelê Rojavayê Kurdistanê xwe bi awayekî kom bi kom rêxistin dike. Komên ewlehiyê yên gel tax, kolan û herêmên xwe li dijî her xeteriyekê diparêzin. Bi şevê şênî li nava kolan û taxan digerin, nobedariyê dikin, ciwan jî li ser noqteyên kontrolê ne. Welatî bi awayek nizamî karbeşiyê dike û nobeta parastinê didomîne.
Fermandarekî HSDê: Yekîtî ji hemû fitneyan mezintir e
Fermandarekî HSDê yê bajarê Hesekê peyamek da welatiyên li bajar û diyar kir ku yekitiya pêkhateyan li hember fitneyan mertala herî xurt e. Di peyama ji welatiyan re hate ragihandin de wiha hate gotin: “Yekîtiya pêkhateyan dê komployê têk bibe. Li Hesekê li derdora wî bi dehan parêzvanên bajêr bi coş û ruhê berxwedanê sekinîne û ji parastinê re amade ne. Komploya bi armanca derbekirina pêkhateyan aşkera bû. Em şerê hev du nakin, wê dawî li fitneyê bê. Em soz didin tevahî pêkhateyan em ê bi ser bikevin.” Ligel hemû sorkirina îstîxbaratên derveyî yên wekî Tirkiye û Qatarê jî ji pêk hateyên cuda welatî tev li parastina nobetê dibin. Jineke ji pêkhateya Ereb li bajarê Çilaxa tevî sermayê jî, zaroka xwe ya biçûk hildigire û tev li nobeta parastinê dibe.
