Dewleta Tirk ku divê li gorî Peymana 29ê Çileyê hêzên xwe yên xwe yên leşkerî û sivîl ji Serêkaniya dagirkirî derekve, niha li dû lîstikên nû ye. Çavaniyek ji bajar anîn ziman ku îstîxbarata Tirk bi komên girêdayî xwe re civîn çêkiriye û ji wan xestiye ku çiqas zext li wan bê kirin jî divê bajar terk nekin.
Li gorî Peymana 29ê Çeli ku di navbera Rêveberiya Xweser a Bakur Rojhilatê Sûriyê û Hikumeta Demkî ya Sûriyê de pêk hat divê hemû hêzên biyanî yên li bajarên Kurdan derkevin û niştecihên van bajaran ên bi darê zorê hatine koçberkirin vegerin. Her wiha li gorî heman peymanê dê bi beşdariya Kurdan îdareyên sivîl bên avakirin û bajar ji hêla van îdareyan ve bên rêvebirin. Ligel ku deh roj di ser peymanê re derbas bûn jî dewleta Tirk ji hêj ji deverên dagirkirî derneketiye.
Hêzên Tirk li cihê xwe ne, çete bi fikar in
Niştecihek ji Serêkaniyê ku ji ber sedemên ewlehiyê nexwest navê wî bênivîsandin, anîn ziman ku piştî Peymana 29ê Çile heta niha hêj leşker û îstîxbarata Tirk, wezîfedarên wê yên sivîl saziyên bajar rêve dibin û di pozîsyona wan de guherînek ber bi çav nîne. Çavkanî anî ziman ku komên çete yên Tirkiyê jî derbarê pêşeroja xwe de ketine nav fikaran û ev fikar hindî diçe vedigere hêrs û berteka li hemberî dewleta Tirk.
Civîn bi çeteyan re hate çêkirin
Çavkanî got ku li ser bertekên çeteyan îstîxbarata Tirk çend roj berê bi serçeteyan re civînek pêkaniye û ev agahî dan: “Li gorî agahiyên çeteyan ji derdorê re gotine di civînê de rewşa vegera xwediyên Serêkaniyê û fikarên çeteyan hatine nîqaşkirin. Dewleta Tirk ji çeteyan re gotiye ku dibe zexta terk kirina Serêkaniyê li wan bê kirin û xwestiye ku ligel hemû zextan jî dernekevin û di mayînê de israr bikin.”
‘Tirkiye naxwaze derkeve’
Çavkanî anî ziman ku di civînê de îstîxbarata Tirk soza piştgiriyê jî daye çeteyan û ev agahî dan: “Tirkiye dixwaze meseleya Serêkaniyê dirêj bibe, çeteyên xwe û malbatên wan li vir bihêle. Di dema ji nûve avakirina rêveberiya nû ya navçeyê bêwate bike. Ji ber ku Serêkanî û Girê Spî wekî bendek di navbera Kantona Cizîr û Firatê de difikire. Ji bo wê divê koçber di serî de gelê Kurd vê mijarê her tim di rojevê de bigire.”
Şandeya Koçberên Serêkaniyê ketin nav tevgerê
Şandeyek ji Komîteya Koçberên Serêkaniyê ji bo di demek zûtirîn de koçber vegerin ser axa xwe ket nav tevgerê. Şandeyê di 10ê Sibatê de serdana Parêzgarê Hesekê Nûredîn Îsa kir û li ser mijarê hevdîtin pêk anî. Parêzgar Nûredîn Ehmed Îsa got ku doza vegera koçberên Serêkaniyê yek ji dozên sereke ye û ew li ser rê û rêbazên vegera ewle ya koçberên Serêkaniyê dixebitin. Biryar hate dayîn ku Komîteya Koçberên Serêkaniyê û Parêzger Îsa cardin bi vê rojevê civîn bigirin.
Divê Parêzger Îsa wezîfedaran tayîn bike
Li gorî zagona îdarî ya Sûriyê wezîfedarên navçe û bajarokan ji hêla walî ve tên tayîn kirin. Serêkaniyê nevçeyek girêdayî Hesekê ye û divê Parêzgerê nû Nûredîn Ehmed Îsa di rojên pêş de bikeve nav tevgerê. Lê ji ber Tirkiye di dagirkirinê de israr dike û Hikumeta Demkî ya Sûriyê bêdeng dimîne, ev pêvajo dereng dikeve. Helwesta Tirkiyê di heman demê de wekî dijberiya Peymana 29ê Çileyê û sabotejek li dijî pêvajoyê tê nirxandin.
