Meclisa Jinan a DEM Partiyê ku piştî banga Rêberê Gelê Kurd dest bi serdana baskên partiyên siyasî yên jinan kir, li Meclisê serdana şandeya AKPê kir.
Meclisa Jinan a Partiya Wekhevî û Demokrasiyê ya Gelan (DEM Partî) piştî “Banga Aştî û Civaka Demokratîk” a Rêberê Gelê Kurd Abdullah Ocalan serdana baskên partiyên siyasî yên jinan kir. Meclisa Jinan a DEM Partiyê serdanên xwe îro jî domand û serdana AKPê kir.
Şandeya DEM Partiyê ya ji Berdevka Meclisa Jinan a DEM Partiyê Halîde Turkoglû, parlamentera Mêrdînê Salîha Aydenîz, endama Kordînasyona Jinan Fatma Koçyîgît pêk dihat di odeya Serokwekîla Koma AKPê Ozlem Zengîn a li Meclisê de serdana AKPê kir. Di nav şandeya AKPê de Ozlem Zengîn, Leyla Şahîn Ûsta, Seroka Baskên Jinan a AKPê Tûgba Işik Ercan cih girtin. Şandeya AKPê, şandeya DEM Partiyê di derî de pêşwazî kir.
Halîde Turkoglû ya naveroka hevdîtina ku saetekê dom kir vegot, diyar kir ku hevdîtina wan baş derbas bû. Halîde Turkoglû destnîşan kir ku di vê pêvajoyê de rola jinan a di parlamentoyê de dê tevkariyê li aştiyê û pêşvebirina siyasetê bike û diyar kir ku her du şandeyan jî dan zanîn ku divê ev serdan berdewam bikin.
