Lêkolîn.orgê naveroka talîmatên ku dewleta Tirk bi rêya MÎTê berî civîna ku bi navbeynkariya Fransayê li Parîsê tê plankirin ji Şamê re şandibû, bi dest xist.
Di 24ê Tîrmehê de hatibû plankirin ku di navbera Rêveberiya Xweser a Demokratîk a Bakur û Rojhilatê Sûriyê û Hikûmeta Demkî ya Sûriyê de civîn bê lidarxistin. Hatibû plankirin ku civîn li Fransayê pêk bê. Lê ji ber ku Hikûmeta Demkî ya Şamê “ne amade bû” hatibû taloqkirin, dewleta Tirk vê fersendê bi kar anî û dest bi tevgerê kir.
Berî civîna ku di rojên pêş de li Parîsê bi navbeynkariya Fransayê û bi beşdariya Nûnerê Taybet ê DYAyê yê Sûriyê Tom Barrack di navbera Hikûmeta Demkî ya Sûriyê û Rêveberiya Xweser a Demokratîk a Bakur û Rojhilatê Sûriyê de were kirin, lekolin.org naveroka fermana ku MÎTê ji Daîreya Operasyonên Hevpar ên Şamê re şandî bi dest xist.
Heta niha MÎT di civînên di navbera desthilata Şamê û Rêveberiya Xweser a Demokratîk a Bakur û Rojhilatê Sûriyê de her tim amade bû û bi her awayî destwerdan dikir; lê ji ber ku ji civînên Parîsê de nehatiye vexwendin, tê zanîn ku ferman ji endamên heyeta ku dê ji desthilata Şamê beşdarî civînê bibin re şandine.
Li gorî agahiyên ku lekolin.org bi dest xistin, di 27ê Tîrmeha 2025an de dewleta Tirk bi rêya MÎTê talîmatek ji bo heyeta ku dê biçe Parîsê amade kiriye û ev talîmat ji Odeya Operasyonên Hevpar a Şamê re şandiye.
Talîmatên ku MÎTê ji Odeya Operasyonên Hevpar a Şamê re ji bo civînên li Parîsê şandine de, xalên ku divê heyet di rojevê de bi cih bike wiha ne:
– Redkirina entegrasyona Hêzên Sûriyê Demokratîk (HSD) wekî hêzeke rêxistinbûyî di bin banê Wezareta Parastinê ya Sûriyê de.
– Entegrasyona hêzên ku ji aliyê Wezareta Parastinê ya Sûriyê ve hatine rêxistinkirin, bi taybetî HSD, bi awayekî gav bi gav bi bicîhkirina wan.
– Di çarçoveya bicîhanîna peymana ku di 10ê Adara 2025an de hatibû îmzekirin de, girtina kamp û zindanên ku tê de bi taybetî endamên DAIŞê li bakur û rojhilatê Sûriyê hene.
– Radestkirina çekên giran di bin çavdêriya Wezareta Parastinê ya Sûriyê de.
– Bi çavdêriya Hêzên Ewlekariya Navxweyî, dagirkirina parêzgehên Ereb (Reqqa, Tebqa, Dêrazor).
– Ferzkirina prensîba yekîtiya axa Sûriyê û ne parçekirina wê.
– Cîbicîkirina zûtirîn dem a bicîhkirina hêzên Artêşa Ereb a Sûriyê li bakur û rojhilatê Sûriyê di bin çavdêriya hêzên DYAyê de.
– Entegrasyona saziyên sivîl di Rêveberiya Xweser de û avakirina meclîsên taxan ji bo serjimêriya giştî ya li herêman.
– Pêkanîna bicîhkirina personelên Wezareta Parastinê ya Sûriyê li sînorê Sûriye-Tirkiye-Iraqê.
– Radestkirina kontrola qadên petrolê yên li Bakur û Rojhilatê Sûriyê ji hikûmeta Sûriyê re.
