Endama Heyeta Îmraliyê Pervîn Bûldan di şahiya 8ê Adarê ya li Wanê de axivî û got: “Xwedîderketina pêvajoyê erka me hemûyan e. Ji bo serkeftina pêvajoya Entegrasyona Demokratîk, em ê ligel jinan mil bidin vê pêvajoyê û em ê bi ser bikevin.”
Tevgera Jinên Azad (TJA), bi boneya 8ê Adarê Roja Jinan a Cîhanê li saloneke dawetê ya li Wanê bi şiara “Bi berxwedanê azad dibin, civaka demokratîk dihonin” şahiyek li dar xist. Di şahiyê de dowîzên bi nivîsên “Şoreşa jinê şoreşa civakê ye”, “Dîroka jinê, dîroka berxwedanê ye”, “Bi jin, jiyan, azadî ber bi jiyana komunal ve”, “Bi TJAyê ber bi civaka demokratîk ve” hatin hilgirtin. Jinên ku hatin eywanê bi dirûşmên “Jin, jiyan, azadî”, “Bijî Serok Apo” û “Rojîn Kabaiş îsyana me ye” salon hejandin.
‘Yek ji aktoran jî jinên Kurd in’
Seroka Komeleya Jinan a Rosayê Zeynep Sîpçîk diyar kir ku 8ê Adarê ji bo wan ne tenê pîrozbahî, rojeke têkoşînê ye û got: “Îro li her derê cîhanê jin ji bo maf û nasnameya xwe bi coşeke mezin dadikevin qadan. 8ê Adarê ji bo me têkoşîna Clara, Sakine, Fatma û Sêvê ye. Hêzên kapîtalîst û hegemonîk li tevahiya cîhanê şerekî qirêj dimeşînin. Ev hişmendî li Rojava êrişî jinan kir, lê jinan li ber xwe da û ew hişmendî rawestand. Li Rojhilat jî heman hişmendî li pey qirkirina jinan e. Em têkoşîna jinên Rojhilat silav dikin. Ji bo serkeftina pêvajoya ku birêz Ocalan daye destpêkirin, divê azadiya wî ya fîzîkî bê pêkanîn.”
Rojîn Kabaiş hat bibîranîn
Piştre peyama Dayikên Aştiyê û Înisiyatîfa Edaletê ya ji bo Rojîn Kabaiş hat xwendin. Di peyamê de bang li ATKê hat kirin ku kujeran neparêzeû biryara nepeniyê rake. Jinan bi dirûşmên “Rojîn Kabaiş îsyana me ye” bersiv da peyamê.
‘Em ê xwedî li pêvajoyê derkevin’
Endama Heyeta Îmraliyê ya DEM Partiyê û Serokwekîla Meclîsê Pervîn Bûldan mafê axaftinê wergirt û di axaftina xwe de bal kişand ser pêvajoya nû. Pervîn Bûldan got: “Daxwaza jinan a azadî û wekheviyê berdewam dike. Heya jin bi nasnameya xwe bi azadî bijîn, em ê li ber xwe bidin. Ev pêvajo heye û divê em hemû bi çar destan li vê pêvajoyê xwedî derkevin. Ev erka me hemûyan e. Gav hatiye avêtin bo qonaxeke nû. Em ê tevî jinan mil bidin pêvajoya Entegrasyona Demokratîk û em ê ji heqê vê derkevin. Di cihê ku jin lê tune be, behsa aştî û demokrasiyê nayê kirin. Werin em bi hev re bi berxwedana xwe aştiyê bînin vê xakê.”
‘Divê qeyim herin’
Pervîn Bûldan bal kişand ser tayînkirina qeyiman û wiha pê de çû: “Gelê Wanê di hilbijartinan de dengê xwe da hevşaredarên DEM Partiyê. Lê qeyim hatin tayînkirin. Heke hûn dixwazin piştgiriyê bidin vê pêvajoyê, divê hûn qeyiman paşve bikişînin û hevşaredaran vegerînin ser wezîfeya wan. Rakirina qeyiman dê xizmeta aştiyê bike.”
‘Em ê rê nedin qirkirina gelan’
Pervîn Bûldan der barê şerê Îran, Îsraîl û DYAyê de jî got: “Em ne şer, aştiyê diparêzin. Divê şerê li dijî Îranê raweste û hemû gel, bi taybetî Kurd, wekî hemwelatiyên wekhev bijîn. Kurd dixwazin weke hemû gelên din bi ziman û çanda xwe bijîn. Divê bêhiqûqiya ku li gelê Kurd tê kirin bi dawî bibe. Di serdemek ku cîhan bi hêşê çêkirî (AI) tê birêvebirin de, em ê rê nedin qirkirina gelan. Bila aştî bê hemû Rojhilata Navîn, ji Kurdan re û ji hemû gelan re; lê herî pêşî bila ji bo jinan bê.”
Piştî axaftina Pervîn Bûldan, peyama 8ê Adarê ya Rêberê Gelê Kurd Abdullah Ocalan bi Kurmancî û Tirkî hat xwendin.
Şahî bi konsera Koma Sorjiyan bi dawî bû.
