Platforma Yekitiya Jinên Kurd a Bakurê Kurdistanê pîrozbahiyê li Platforma Yekitiya Jinên Kurd a li Silêmaniyê hat damezrandin, kir.
Platforma Yekitiya Jinên Kurd ya Bakurê Kurdistanê têkildarî damezrandina Platforma Yekitiya Jinên Kurd ku bi beşdariya 24 rêxistin, tevger û saziyên jinên çar aliyên Kurdistanê li Silêmaniyê pêk hat, ji bo pîrozbahiyê daxuyaniyek nivîskî weşand.
Daxuyaniya Platforma Yekitiya Jinên Kurd a Bakurê Kurdistanê bi vî rengî ye:
“Ji çapemeniyê û raya giştî re Jinên Kurd ku hêza herî dînamîk û veguherîner a têkoşîna azadiya jinê ne, careke din peywîra xwe ya pêşengtiya dîrokî bi cih tînin û di pêşengtiya Jinê de ji bo avakirina yekîtiya neteweyî gaveke girîng avêtin.
Platforma Yekitiya Jinên Kurd a ku bi mejiyê kolektîf û îradeya birêxistinkirî ya jinên ku li çar parçeyên Kurdistanê di eniyên cuda de li berxwe didin û têdikoşin hatiye avakirin, ji bo gelê me û xeta azadiya Jinê gaveke dîrokî ye. Em avakirina Platforma Yekitiya Jinên Kurd bi coş û kelecanî silav dikin! Ev yekîtî ne tenê gaveke siyasî ye; di heman demê de soza ku ji bo avakirina bîreke kolektîf a jinan, berxwedaneke kolektîf û siberojeke kolektîf hatiye dayîn e jî. Li erdnîgariya ku mejiyê mêr-dewlet sînoran xêz dike, jin li ser xeta azadiya Jinê nexşeriya jiyaneke azad û wekhev, yekitiya netewî û çareseriya demokratîk diyar dikin.
Yekitiya jinan yekitiya gelan e. Hêza birêxistinkirî ya jinê sîgortaya azadiya gelan e. Platforma Yekitiya Jinên Kurd; Pirek di navbera dilê jinên Kurd yên li çar parçeyên Kurdistan û çar aliyê cîhanê dijîn de ava kir. Avakirina vê Platformê bersiva parçebûyînê ye. Bersiva kesên ku li dijî polîtîkayên înkar û îmhayê di jiyaneke azad de israr dikin e. Avakirina vê Platformê banga jiyana azad a ku di pêşengtiya şoreşa Jinê de pêşketiye ye. Avakirina vê Platform banga yekitiya neteweyî ye.
Em wek Plantforma Yekitiya Jinên Kurd a Bakurê Kurdistanê damezrandina Platformê pîroz dikin û diyar dikin kû bi hemû hêza xwe bi vê pêngava dîrokî re ne. Em serbilind in ku perçeyekî tekoşîna azadiya Jinê ne. Her gaveke ku dê di vê riyê de bê avetin, dê bibe serkeftina îradeya yekbûyî ya jinê.
Bijî Yekitiya Jinên Kurd! Jin, Jiyan, Azadî!”
