Çekdarên Hikumeta Demkî li Dêr Hafirê komkujî pêk anî. QSDê bertek nîşanî daxuyaniyên Hikûmeta Demkî ya Şamê da û wiha got: Berpirsê Komkujiya Dêr Hafirê Hikûmeta Şamê ye.
Navenda Ragihandinê ya Hêzên Sûriya Demokratîk (QSD) duh bi şev ragihand ku di encama êrişa çekdarên Hikumeta Veguhêz a Sûriyeyê li dijî Gundê Um Tîna yê bajarokê Dêr Hafirê yê Rojhilatê Helebê komkujiyek pêk hat û di êrişê de 7 welatiyên sivîl jiyana xwe ji dest dan, 4 jî birîndar bûn. Hikûmeta Şamê li ser malpera xwe ya fermî SANAyê piştî êrişê daxuyanî da û îdia kir ku êrişa ku hatiye kirin QSDê pêk aniye. QSDê ev daxuyanî derewand û da zanîn ku Hikûmeta Şamê ya Demkî êrişên xwe qebûl nake, li şûna wê agahiyan berovajî dike.
7 sivîl jiyana xwe ji dest dan 4 jî birîndar bûn
Navê welatiyên sivîl ên hatine kuştin wiha ne: “Emîne Mihemed El Ezawî (75), Fatme Heya Ubêd (65), Emîne Mihemed El Hemze (22), Eyşe Hemze Ubêd (18), Hemze Ubêd Ebdurezaq (4), Ebdulxenî Rehman El Ubêd (yek salî), Rehef Hisên El Ezawî (23).” Welatiyên bi navên Cuma Hemûd El Mihêsin (60), Meryem Hemo El Mihêsin (55), Helîme Mehmûd El Mihêsin (65), Emîne Hemûd El Emûre (20) jî ji êrişê birîndar xelas bûn.
Çi bûbû:
Şeva borî Hikûmeta Şamê êrişî mewziyên Hêzên Sûriyeya Demokratîk (HSD) kir. Bi bersivdana HSDê re pevçûn derket. Hêzên Hikûmeta Şamê Gundê Um Tîna yê girêdayî bajarokê Dêr Hafirê dan ber bombeyan û di encama bombebaranê de 7 sivîl jiyana xwe ji dest dan û 4 sivîl jî birîndar bûn.
