Fatmanûr Çelîk û keça wê Hîfa Îkra Şenguler piştî îstismara zayendî ya Ayhan Şenguler di 2yê Adarê de bi awayekî bi guman jiyana xwe ji dest dabûn. Beriya dozê rêxistinên jinan li pêşiya edliyeyê bang kirin û xwestin faîl Ayhan Şenguler were cezakirin.
Rêveberê Weqfa ji Quranê re Xizmet Ayhan Şenguler, Fatmanûr Çelîk û keça wê Hîfa Îkra Şenguler îstismar kiribû. Paşê Fatmanûr Çelîk û Hîfa Îkra Şenguler bi aweyekî bi guman di 2yê Adarê de jiyana xwe ji dest dabûn. Rêxistinên jinan beriya danişîna dozê ya biryarê li pêşiya Edliyeya Anadoluyê ya li Kartalê daxuyanî da. Jinan pankarta “Ji bo Fatmanûr Çelîk û Hîfa Îkra Şenguler edalet” vekirin. Beyza Bolukbaşi li ser navê rêxistinên jinan daxuyanî xwend.
‘Biryara ku îro were dayîn divê deriyê edaletê veke’
Beyza Bolukbaşi diyar kir ku Fatmanûr Çelîk û keça wê Hîfa Îkra Şenguler gav bi gav ber bi kuştinê ve çûn û wiha axivî: “Fatmanûr beriya ku jiyana xwe ji dest bide gotibû ‘tişteke were serê min nebêjin întîxar e’. Ev gotin ne tenê hişyarî bû. Kesê ku îro hesap bide ne tenê faîl Ayhan Şenguler e, saziyên ku pêşiya vê mirinê ne girtin jî berpirsiyar in. Wezaret îhmalkar e, dewlet bêdeng ma. Di mirina Fatmanûr Çelîk û Hîfa Îkra Şenguler de hê delîl nehatibûn komkirin wekî întîxar hat ragihandin. Lê em dizanin ku di gelek bûyeran de di serî de tê gotin ku ‘întîxar e’ lê bi têkoşîna jinan rastî derketin holê. Em ê di mirina Fatmanûr Çelîk û Hîfa Îkra Şenguler de jî ji kujer û faîlan hesab bipirsin. Divê demildest faîl Ayhan Şenguler were cezakirin. Biryara ku îro dê were dayîn divê deriyê edaletê veke.”
Daxuyanî bi berzkirina dirûşmeya “Ji bo Fatmanûr Çelîk û Hîfa Îkra Şenguler edalet” bi dawî bû.
