Êlih – Serokê Komeleya Timoqiyan a Êlihê parêzer Ferhat Bayindir bi lêv kir ku heta êrişên li Rojavayê Kurdistanê bi dawî nebin dê aramî nayê Bakurê Kurdistanê jî û got: “Şer û êrişên li ser Rojava pêvajoya li vir daye sekinandin.”
Ji 6ê Çile ve li dijî Rojavayê Kurdistanê êrişên qirkirinê pêk tên. Êrişên çeteyên DAIŞê, HTŞê û SMOyê li ser Rojava bi dijwarî berdewam dikin. Gelê Kurd û dostên xwe li çar aliyên Kurdistanê û dinyayê li ber xwe didin û bi ruhê seferberiyê êrişan protesto dikin. Ji her beşên civakê yên li Kurdistanê hêrs û nerazîbûna li dijî êrişên têkbirina destkeftiyên Rojava didome.
Serokê Komeleya Timoqiyan a Êlihê parêzer Ferhat Bayindir derbarê êrişên li Rojava de ji Ajansa Welat re axivî.
‘Êrişên li ser Rojava bandorê li vir dike’
Ferhat Bayindir diyar kir ku bi destpêkirina şerê Rojava re bandora xwe li ser pêvajoya ku li Tirkiyeyê hatiye destpêkirin jî dike û wiha got: “40 sal in em bi çavên xwe dibînin ku pirsgirêka Kurd bi şerê çekdarî nayê meşandin. Ji ber vê yekê hemû pevçûnên ku li Rojhilata Navîn diqewimin nayên çareserkirin. Em ji ber êrişên li ser Rojava gelek xemgînin. Em naxwazin mirovên me yên li wir bi kuştinê re rû bi rû bimînin û ji cih û warên xwe bêne koçberkirin. Ev êrişên ku têne kirin em bi tund şermezar dikin û em dixwazin êriş bêne sekinandin. Her wiha li Kurdistan û Tirkiyeyê jî pêvajoyek heye û divê ev pêvajo pêş ve biçe. Ev pirsgirêk jî bi rêya diyalogê tê çareserkirin. Li Rojava mirovên me dijîn û xesara ku li wir tê kirin, bandora xwe li vir jî dike. Di nava vî 10-15 rojî de bi şerê Rojava re pêvajo li Tirkiyeyê hatiye sekinandin. Heta ku şerê li Rojava hebe aramî nayê vir jî. Divê aştî li hemû Rojhilata Navîn pêk bê û her kes bigihîje aramiyê.”
‘Divê Kurd bigihîjin mafên xwe bingehîn’
Ferhat Bayindir anî ziman ku divê Kurd li her çar aliyên Kurdistanê bigihîjin mafên xwe yên bingehîn û got: “Di vir de nakokiyeke mezin heye, îro li Rojava şer didin meşandin û li Bakur dibêjin em ê aştiyê pêk bînin. Herdu bi hev re nayên meşandin û pêvajoyê dixitimîne. Divê aştî yek alî be, çawa li Bakur pavajo heye divê li Rojava jî aramiyek hebe. Li her çar parçeyên Kurdistanê divê Kurd bigihêjin mafên xwe yên bingehîn, ji ber ku pirsgirêka wan yek e. Li her çar perçeyên Kurdistanê pirsgirêka çand, ziman, dîrok û nasnameyê tê jiyîn. Divê ev pirsrgirêk bi rêya demokrasiyê, edaletê û hiqûqê bê çareserkirin. Li cihekî şer hebe aborî, mafê mirovan, edalet û demokrasî ji holê tê rakirin, aştî pêk nayê. Şer; mirovahiyê û civakan û her kesî diqedîne. Aştî ji bo me tiştekî herî pîroz e. Dema ku aştî di nava me de hebe em ê bêtir aram bin. Pirsgirêka Kurd bi rêya demokrasiyê dikare were çareserkirin. Dema ku şer û pevçûn hebin dê tu carî pirsgirêk nayên çareserkirin.”
