Amed – Serokê Odeya Bazirganiyê û Pîşesaziyê ya Cizîrê Omer Farûk Yildirim û Serokê Borseya Bazirganiyê ya Wanê Naîf Suer ku li Amedê tev li daxuyaniya 53 saziyên bazirganiyê bûn, xwestin gav bên avêtin û ew ji bo pêkanîna aştiyê piştgiriyê didin pêvajoyê.
Partiya Karkerên Kurdistanê (PKK) di 12ê Gulanê de daxuyanî da û xwefesixkirina xwe ragihand. Piştî daxuyaniya PKKê li Kurdistan, Tirkiyê û gelek welatên cîhanê biryara PKKê erênî hat nirxandin. Gelek kesayet, sazî, partî û tevger daxuyanî didin û piştgiriyê didin pêvajoyê. Duh li Amedê bi pêşengiya Odeya Bazirganî û Pîşesaziyê ya Amedê bi beşdariya 53 odeyên bazirganî û pîşesaziyê û borseyên bazirganiyê daxuyanî hat dayîn û piştevaniya pêvajoyê hat kirin. Ji beşdarên daxuyaniyê Serokê Odeya Bazirganî û Pîşesaziyê ya Cizîrê Omer Farûk Yildirim û Serokê Borseya Bazirganiyê ya Wanê Naîf Suer ku tev li daxuyaniyê bûn ji Ajansa Welat re axivîn.
Yildirim: Divê demildest gav bên avêtin
Serokê Odeya Bazirganî û Pîşesaziyê ya Cizîrê Omer Faruk Yildirim diyar kir ku îro odeyên bazirganiyê yên li herêmê ji bo aştiyê bangawazî kirin û wiha axivî: “Divê hê jî ji bo aştiyê dereng nebe, divê gav bên avêtin. Aştî ji bo me gelek girîng û bi qîmet e. Dewlet ji bo aştiyê hin tişt xwest PKKê jî gav avêt. Me divê bêyî ku ev rewşa baş xera bibe, divê dewlet jî PKKê jî gav biavêje. PKKê xwe fesix kir divê dewlet jî di aliyê hiqûq û mafên mirovan de li ser van mijaran gav biavêje. Em hêvîdarin ku di qanûna de Kurd bên naskirin. Em hêvîdarin wê gav bên avêtin û çek êdî nekevin dewrê. Divê gav demildest bên avetin. Wext jî ji bo gav avêtinê gelek girîng e, ji ber ku divê pêvajo bi sabotajan re rû bi rû nemîne. Wekî berê ku pêvajo hat xerakirin, em wek wê carê naxwazin dîsa ew tişt biqewimin. Em dixwazin bi aştiyek bi rûmet pêk were. Aştî pêk were êdî wê gelê me hewceyî pê nebîne ku biçe derveyî welat û bajêr bixebitin.”
Suer: Em heta dawiyê piştgirî didin pêvajoyê
Serokê Borseyha Bazirganiyê ya Wanê Naîf Suer jî destnîşan kir ku ji bo tevahiya Tirkiyeyê pêvajo gelek girîng e û wiha got: “Welatê me gelek zordarî kişand. Jixwe navê wê çiqas xweş e. Aştî tiştêkî gelek xweş e. Em heta dawiyê piştgirî didin pêvajoyê. Baweriya me heye ku pêvajo berdewam bike. Kesên ku ji neçarî gundên xwe terikandin hene, em bi hêvî ne wê ev aştî bandorê li ser bike û her kes vegere gundên xwe. Bila her kes li cem malbata xwe bijî. Gel gavên ber bi çav dixwaze bibîne. Baweriya me heye ku di rojên pêş de em ê tiştên xweş bibînin. Di pêvajoyên şer de welatên me ket nava gelek krîz û kêmasiyan. Welatê me li paş ma. Heta îro gavên mezin nehatine avêtin lê baweriya gel ji pêvajoyê heye. Her kes dixwaze di nav aştiyê de bi kêfxweşî bijî. Dema ku şer hebe gel xizan dibe. Kes li vir kar nedikir. Ez bawer im dê bi aştiyê êdî rewşa aborî jî baş bibe.”
