Waliyê Silêmaniyeyê Heval Ebubekir diyar kir ku yekbûna gelê Kurd û Kurdistanê li dora Rojava yekpare bûye û got: “Ev piştgirî îlana yekîtiya neteweyî ye. Ev hevgirtin berê jî hebû, îro dom dike û dê di siberojê de jî bidome.”
Waliyê Silêmaniyê Heval Ebubekir ku ji bo çend hevdîtinên dîplomatîk li Londonê ye, têkildarî êrişên li ser Rojavayê Kurdistanê û hevgirtina Kurdan a li dora Rojava bûye yek, ji ANFê re axivî. Ebubekir got ku Rojava mîsogeriya aramî û aştiya herêmî ye û wiha axivî: “Li Silêmaniyê di her astê de; saziyên dewletê, partiyên siyasî, rêxistin, hêzên bijarte û gel bi hemû rengên xwe piştgiriya tam ji xwîşk û birayên xwe yên Rojava re dikin û vê ezmûna siyasî ya nû ya ku em hêviyên mezin pê ve girê didin dikin. Em biryardar in ku modela nû were avakirin, aramiya herêmî were peydakirin û ev were parastin. Ev piştgirî ne tenê îro, di rabirdûyê de jî hebû, îro didome û bi hêviyeke xurt ber bi pêşerojê ve tê veguheztin.”
Ev îlana yekîtiya neteweyî ye
Bi mezinbûna piştgiriya berxwedanî re Ebubekir da zanîn ku îro ji bo Kurdistanê li ser asta cîhanê sembola yekîtiya neteweyî û kolektîf e û got: “Kurdên li seranserê cîhanê, tevî cudahiyên navxweyî û dîroka perçekirî ya xwe, li gorî îradeya siyasî ya hevpar, bername, plansaziya stratejîk û armancan yekbûne; li hemberî Rojava helwesteke yekane û zelal nîşan dane. Ji ber vê yekê ez îro wekî ‘Roja Yekîtiya Netewî û Kolektîf a Kurdên Cîhanê’ îlan dikim.”
Walî Ebubekir diyar kir ku ev yekbûna îro xala zivirînê ya pêvajoya kordînasyon, lihevhatin û yekîtiya siyasî ya Kurdên li seranserê cîhanê ye.
