Sêrt – Endam û rêveberên DBPê û DEM Partiyê yên Sêrtê diyar kirin armanca dewleta Tirk û çeteyên HTŞê û DAIŞê têkbirina destkeftî û têkoşîna gelê Kurd e û gotin: “Dixwazin komkujiyeke nû bînin serê gelê Kurd û rojavayê Kurdistanê.”
Li ser banga seferberiya neteweyî ya Rêveberiya Xweser a Rojava çar aliyên Kurdistanê û hemû Kurdên dinyayê û dostên wan ji bo xwedîderketina li destkeftiyên Rojavayê Kurdistanê rabûne berxwedan. Gelê Bakurê Kurdistanê jî ji bo Rojava rabûye ser pêya û xwedî li Rojava derdikeve. Welatî û rêveberên Partiya Wekhevî Demokrasiyê ya Gelan (DEM Partî) û Partiya Herêmên Demokratîk (DBP) ên Sêrtê jî piştgiriyê didin berxwedana gelê Rojava ya li dijî êrişên çeteyan.
Welatiyên Sêrtê ji ajansa me re axivîn û nerazîbûn nîşanî êrişên çeteyan dan.
‘Cîhan hemû niha bûye neyarê Kurdan’
Welatiyên dibêjin ew ê xwedî li destkeftiyên Rojava derkevin, wiha axivîn: “Di sala 2014-2015an de li ser Rojavayê Kurdistanê hate kirin, Ew çax jî gelê Kurd bi komkujiyan re rû bi rû ma. Cîhan hemû deyndarên Rojava ye û divê peywira xwe bi cih bîne. Niha dewletên cîhanê bûne neyarên Kurdan. Tişta ku li Rojava tê kirin li dijî paradigmaya nû ya ku hatiye avakirin e. Ev êriş di esasê xwe de li dijî paradîgmaya Rêber Apo ye.
Dixwazin komkujiyeke nû li ser gelê Kurd û rojavayê Kurdistanê bidin çêkirin. Me gelek bedel daye, li nava axa Rojava bi hezaran şehîdên me hene. Hemû komkujiyên ku li rojavayê Kurdistanê têne kirin bi çetewarî ne û dixwazin Kurdan di qirkirinan de derbas bikin. Em Kurd ji bo hebûna xwe li ser lingan e. Em dil germ in û xwîna me dikele û li Rojava xwişk û birayên me û zarokên me di çeperên şer de singa xwe didin ber gulan. Rojava neketiye û wê tu carî jî nekeve û tu carî jî nikarin Rojava ji destê me derxin. Ev tişta ku van çeteyan dikin derbeyeke li Kurdistanê dixin û li îslamiyetê jî dixin. Ger ku dunya xerabibe ji me hemûyan re xerab e ku başbe jî ji me hemûyan re baş dibe. Em her tim ji bo aştiyê amadebûne û em ê amade bin.”
