Piştî Amerîkayê biryara sepandina cezayên deryayî li ser Tengava Hurmuzê da, Îranê jî gefa girtina Tengava Babûl Mendebê xwar. Li gorî medya Îranê, gefên Donald Trump êdî tu bandorê nakin û ger ev gef bibandor bûna, Trump li pey agirbestê nedigeriya.
Fermandariya Navendî ya Dewletên Yekbûyî yên Amerîkayê (CENTCOM) ragihand ku ew ê hemû trafîka deryayî ya bendergehên Îranê dorpêç bikin. CENTCOMê da zanîn ku dorpêça li ser Tengava Hurmuzê îro dest pê dike.
Îran: Gefên Trump êdî tu bandorê nakin
Li hemberî van gefan, Îranê jî daxuyand ku ger Amerîka Tengava Hurmuzê dorpêç bike, ew ê jî Tengava Babûl Mendebê ya ku di bin kontrola komên nêzî wê de ye, bigirin. Li gorî ajansa Tesnîm a Îranê, çavkaniyên di nava rayedarên Îranî de destnîşan kirine ku gefên Trump êdî tu bandorê nakin. Çavkaniyê wiha got: “Ger ev gef bibandor bûna, Trump di rewşeke tengezar de nedima û li pey agirbestê nedigeriya.”
Her wiha hate destnîşankirin ku ev helwestên Amerîkayê ne tenê rê li ber çareseriyê digirin, di heman demê de dikarin bibin sedema ji destdana kontrola Tengava Babûl Mendebê jî. Çavkaniyan dane zanîn ku ev yek dikare bibe sedema astengiyên mezin û zêdebûna xercê veguhestina enerjî û bazirganiya cîhanî.
Trump çi gotibû?
Ev hişyariyên Îranê piştî gefên Donald Trump ên derbarê vekirina Tengava Hurmuzê de hatin. Trump îdia kiribû ku kiryarên Tehranê dibin sedema bêîstîkrariya cîhanê û wiha gotibû: “Em ê Tengava Hurmuzê dorpêç bikin. Ez dikarim di rojekê de Îranê tune bikim û 10 salan ceyrana wan bibirim. Wê çarenûsa aboriya Îranê ji ya Venezuelayê xirabtir bibe.”
Girîngiya Tengava Babûl Mendebê
Tengava Babûl Mendebê di cîhanê de xwedî cihekî gelekî stratejîk e. Ev tengav li başûr û rojhilat bi Yemenê û li bakur û rojava bi Cîbûtî û Erîtreyê re sînor e. Babûl Mendeb xala girêdana Deryaya Sor û Kendava Adenê ye û piraniya keştiyên bazirganiyê yên ku ber bi Kanala Suweyşê ve diçin, di vê tengavê re derbas dibin.
