Li Bakurê Kurdistanê 12 baroyan bertek nîşanî êrişên dewleta Tirk ên li ser Bendava Tişrînê dan û gotin: “Hewceye sivîl di her şert û mercan de bên parastin.”
Baroyên Amed û Wanê jî di nav de 12 baroyên bajarên Bakurê Kurdistanê têkildarî êrişên ser sivîlên li Bendava Tişrînê ya li Rojavayê Kurdistanê nobetê digirin, daxuyanî dan. Di daxuyaniyê de hat bibîrxistin ku di êrişa dawî de Şanogerê Kurd Bavê Teyar (Cûma Xelîl Îbrahîm) jî di nav de 6 sivîl hatine kuştin. Di daxuyaniya bi sernavê “Divê sivîl di her şert û mercan de bên parastin” de hat diyarkirin ku êrişa li dijî sivîlan, bi awayekî eşkere binpêkirina hiqûqa navneteweyî ye.
‘Divê li gorî hiqûqa mirovhez tevbigerin’
Di berdewamiya daxuyaniyê de wiha hat gotin: “Li herêmên din ên Sûriyeyê êdî jiyan asayî bûye lê li Bakur û Rojhilatê Sûriyeyê careke din pevçûn dest pê kirin. Di êrişa herî dawî ya li dijî Bendava Tişrînê de hunermendê Kurd Cuma Xelîl Îbrahîm (Bavê Teyar) jî di nav de 6 sivîlan jiyana xwe ji dest dan û 15 sivîl jî birîndar bûn. Xwedê rehma xwe li lîstikvanê şanoyê Bavê Teyar ku civaka Kurd zêde jê hez dike û sivîlên din ên jiyana xwe ji dest dayin bike û ji bo birîndaran jî şîfaya xêrê dixwazin. Ev êrişa li dijî sivîlan, bi awayekî eşkere binpêkirina hiqûqa navneteweyî ye. Parastina sivîlan a li qada şer, berpirsyartiyeke navneteweyî ye. Divê li gorî Peymana Cinevê û qeydên hiqûqa mirovhez tevbigerin.
Divê aktorên navneteweyî bikevin tevgerê
Mirinên sivîlan, zemîna çareseriya bi rêbazên aştiyane xera dike û rê li ber travmayên civakî yên cidî vedike. Weke baroyên herêmê yên îmzeyên wa li jêr; ji bo pêşîlêgirtina mirina sivîlan a li Bakur û Rojhilatê Sûriyeyê em bang li aktorên navneteweyî û civaka navneteweyî dikin ku bikevin nava tevgerê.”
Baroyên ku metna daxuyaniyê îmze kirin ev in: Semsûr, Agirî, Êlih, Amed, Îdir, Colemêrg, Mêrdîn, Mûş, Sêrt, Riha, Şirnex û Wan.
