Înîsiyatîfa Yekîtiya Demokratîk bi daxuyaniyekê bal kişand ser peyama Rêberê Gelê Kurd Abdullah Ocalan a îro û wiha got: “Pêdivî bi qanûnên aştiyê heye da ku entegrasyona demokratîk pêk were. Lewra pirsgirêka Kurd tenê ne pirsgirêka çekan e, herwiha bi pirsgirêkên polîtik û neteweyî ve jî girêdayî ye.”
Rêberê Gelê Kurd Abdullah Ocalan di 27ê Sibata 2025an de banga “Aştî û Civaka Demokratîk” li raya giştî ya Tirkiyeyê û bakurê Kurdistanê kir. Vê bangê bi taybetî li Tirkiye û Kurdistanê, li Rojhilata Navîn û gelek welatên cîhanê deng veda. Rêberê Gelê Kurd Abdullah Ocalan bi boneya salvegera banga xwe ya 27ê Sibata 2025an daxuyaniyek weşand. Abdullah Ocalan di daxuyaniya salvegera Banga 27ê Sibatê de çarçoveya merheleya dema pêş wekî ‘serdema entegrasyona pozîtîf’ pênase dike. Abdullah Ocalan pîvanên welatîbûnê, çêkirina qanûnên aştî û azadiyê, qadên divê qanûn bên çêkirin û rêbazên pêşxistina pêvajoyê rave dike.
Înîsiyatîfa Yekîtiya Demokratîk jî têkildarî salvegera Banga 27ê Sibatê daxuyaniyeke nivîskî weşand. Înîsiyatîfê diyar kir ku bi sedan salan e ku li Rojhilata Navîn şer û pevçûn kêm nebûne û wiha got: “Daxwaza azadî û wekheviyê ya gelan hertim bi tundî hatiye çewisandin. Lewra vîna netewe û baweriyan tu car bi helwesteke demokratîk nehatiye pêşwazîkirin û sînor li gorî mejiyê netewe-dewleta yekperest hatine xêzkirin. Bêguman bandora van polîtîkayan li seranserê kurdistanê jî giran bûn û wekî pirsgirêka Kurd heta roja îro jî hertim xwe dan hîskirin. Lê êdî ji aliyê netewe-dewletan ve jî tê qebûlkirin ku heta hemû bawerî, netewe û çand azad nebin; pêşketina aborî û civakî jî ne pêkan e. Lewma Rojhilata Navîn îro di qonaxeke gelek krîtîk re derbas dibe.”
‘Banga Birêz Ocalan ji bo bihevrejiyîna gelan perspektîfeke dîrokî ye’
Înîsiyatîfê anî ziman ku Banga Aştî û Civaka Demokratîk ya Rêberê Gelê Kurd Abdûllah Ocalan ji bo çareseriyeke adilane û aştiyane di 27ê Sibata 2025an de hat kirin û wiha domand: “Banga birêz Ocalan ne tenê ji bo rêbaza çareseriyê ya demokratîk, di heman demê de ji bo bihevrejiyina gelan perspektîfeke dîrokî ye. Lewra perspektîfa birêz Ocalan ligel çareseriya pirsgirêkên sîyasî, ji bo jiyaneke azad û aştiyane avakirina civaka demokratîk jî esas digire. Di çarçoveya banga birêz Ocalan de PKKê jî di nava sala 2025an de gavên krîtîk avêtin. Di nava saleke de PKK hat fesihkirin, çek hatin şewitandin û pêvajoya paşvekişandinê dan destpêkirin. Her çiqas avakirina Komîsyona Piştgiriya Neteweyî, xwişk – Biratî û Demokrasiyê pêşketineke erênî be jî hê jî tu gavên şênber li holê tune ne.”
‘Divê dewlet û hikumet wekî taktîkeke siyasî nêzîkî vê pêvajoyê nebe’
Înîsiyatîfê bi lêv kir ku rapora ku ji aliyê Komisyonê ve di vê pêvajoyê de bi rayagiştî re hat parvekirin girîng e û dirêjî da axaftina xwe: “Lê divê gavên yasayî demildest bên avêtin. Divê Dewlet û Hikumeta AKPê wekî taktîkeke sîyasî nêzikî vê pêvajoyê nebe. Lewra ji bo aştiyeke mayînde; he jî pêwistiya bi demokrasî, edalet û wekhevî heye. Dem ne dema gotinê ye, dem dema gavên şênber e.
Li hemberî aloziyan helwesteke Kurdistanî derket holê
Banga 27ê Sibatê ji bo hemû gelê Kurd jî xwediyê girîngiyeke mezin e. Lewra banga 27ê Sibatê li çar parçe Kurdistanê encam da û di nava civaka Kurd de hêviya yekîtiya neteweyî jî zindî kir. Piştî banga birêz Ocalan, di navbera serok û partiyên sîyasî ên Kurd de çûn û hatin zêde bûn, li hemberî aloziyan helwesteke Kurdistanî derket holê. Banga 27ê Sibatê ne tenê ji bo gelê Kurd, di heman demê de ji bo hemû gelên ku li Kurdistanê dijîn, nexşerêya yekîtiya demokratîk e.”
‘Divê dewlet û hikumeta AKPê herî kêm qasî birêz Ocalan cidî nêzîkî pêvajoyê bibin’
Înîsiyatîfê di dawiya axaftina xwe de wiha bang kir: “Di 1emîn salvegera banga Aştî û Civaka Demokratîk de em bang li dewlet û Hikumeta AKPê dikin ku herî kêm qasî cidîyet û hesasiyeta birêz Ocalan nêzikî pêvajoya civaka demokratîk bibin û ne bi gotine, êdî bi kirine tevbigerin. Wekî birêz Ocalan di peyama xwe ya îro de jî dîyar kir, pêdivî bi qanûnên aştiyê heye da ku entegrasyona demokratîk pêk were. Lewra pirsgirêka kurd tenê ne pirsgirêka çekan e, herwiha bi pirsgirêkên polîtik û neteweyî jî girêdayî ye.
Dîsa em bang li hemû gelê Kurd û Kurdistaniyan jî dikin ku bi sekn û baweriya xwe hêz bidin yekitiyeke demokratîk da ku siberojeke azad û aştiyane were avakirin. Lewra bihêzkirin û piştdayîna banga 27ê Sibatê mifteya yekîtiya demokratîk e û çîruska kombûna kongreya neteweyî ye.”
