WAN – Endama Komeleya Cinîyan a Starî ya Wanî Meryem Aslan derheqê hêrişê hemverê Rojawanî de qisey kerd û vat, “hêrişî hemverê modelê demokratîk û cuye ameyo kerdiş. Cinî û tutî hedef de yê.”
Badê rijnayîşê rejîmê Baasî yê Sûrîye, HTŞ’yî îdare kerd bi kontrolê xo û hawirê şerî û hêrişê welatî dewam kenê. Rojawan de hemverê modelê cuye ameyo awankerdiş û şorişê cinî hêriş dewam kenê. Yê tewr zêde zirar vînenê zî cinî û tut ê.
Endama Komeleya Cinîyan a Starî ya Wanî Meryem Aslan derheqê hêrişê hemverê Rojawanî de qisey kerd.
‘Şer şîdetê psîkolojîkî xo dir ano’
Meryem Aslan da zanayîş ke şerî dir şîdetê psîkolojîkî zî zêde bî û wina vat: “Yê ke tewr zêde bi tesîr benê cinî û tut ê. Cinî hawirê şerî de desteştişî dir yenê rî bi rî û dejê pîlî ciwîyenê. Şer bi şîdetê fîzîkî sînor nêmaneno. Yê psîkolojîkî zî xo dir ano. Cinî û tutan dir travmayê pîlî vejîyenê werte.”
‘Travma tesîr serê ameyoxî kena’
Meryem Aslan wina qal kerd: “Şer merdimî weşî û perwerde ra bêpar verdeno. Çîyo tewr xirab zî tutî wareyê kayê xo de bêpar manenê. Nê semedî ra travmayê şerî tesîrêk pîl cuya tutan ser o keno. Tutî travmayê şerî dir eleqe çekan rê mojnenê û hîsê heyfgirewtişî eşkenê vejîyê vernî.”
‘Ma têkoşînê Rojawanî ra îlham gênê’
Meryem Aslan dewam de wina vat: “Na seserre de têkoşînê cinîyan ê Rojawanî nimûneyê tewr pîl o. Têkoşînê cinîyê Rojawanî veng da û semedê cinîyanê dinya bî nimûne. Rojawan bi xeyalê cuyêke azad, têduşt û adîlane cuyêke ameye awankerdiş. No dinya de veng da. Pêro kesî zanê ke bi hêzê cinîyan demokrasî eşkeno pê bêro. Ma têkoşînê cinîyanê Rojawanî hemverê DAIŞ’î de xoverdayîşê îlhamî gênê.”
‘Nasnameyê cinîyan hedef yeno girewtiş’
Meryem Aslan tewr peyîn wina vat: “Qetilkerdişê cinîyan tena hemverê cinîyanê elewîyan yan zî kurdan nîno kerdiş. O yo ke hedef yeno girewtiş nasnameyê cinîyan o. Semedo ke ma êdî nêeşkenê şîn bigîrê zî. Êdî her roje cinî yenê qetilkerdiş. Şînê yewî nêqedêno yê yewî bînî destpê keno. Şorişê cinîyan ê Rojawanî semedê cinîyan hêvî yo. Cinî bi tehlukeyêk pîlî rî bi rî yê. Hemverê nê de ganî pêro hetê komelî bikewê têgêrayîş.”
