HDKê dest bi kampanya ‘Milyonek îmze ji bo aştiyê’ kir. HDK’ê bang li her kesî kir ku ji bo aştiyê bi berpirsyarî rabin.
Kongreya Demokratîk a Gelan (HDK) li otelek li navçeya Beyoglû ya Stenbolê deklarasyona kampanya ‘Milyonek îmze ji bo aştiyê’ ragihand. Hevberdevkên HDKê Meral Daniş Beştaş û Alî Kenanoglû, Hevserokê Giştî yê Partiya Demokrasî û Wekheviyê ya Gelan (DEM Partî) Tûncer Bakirhan jî di nav de nûnerên pêkhateyên HDKê beşdarî civînê bûn.
Hevberdevka HDKa Meral Daniş Beştaş anî ziman ku li cîhanê aştiyeke domdar dikare pêş bikeve û got: “Tenê em şensekê bidin aştiyê. Ji bo em vê şensê bidin, em li vê derê ne. Pir hindik ji bo aştiyê nîqaş têne kirin. Deriyek hatiye vekirin. Dibe ku em gelekî nêz in, dibe ku em ê vê nêzbûnê tayîn bikin. Ji ber vê yekê jî em dest bi kampanya îmzeyan dikin. Aştî pêvajoyeke hêsan nîne. Eger aştî hêsan bûya wê li cîhanê şerên ewqasî mezin nebûya. Du şerên giran ên cîhanê qewimîn. Niha em li ber şerê sêyemîn ê cîhanê ne.”
Meral Daniş da zanîn ku duh agirbestek hate ragihandin, lê bûyerên ku li Xezeyê qewimîn nikarin demeke dirêj ji bîr bikin û wiha axivî: “Divê em biryarekê bidin. Gelo em ê di nava van rûpelên şermê de bin, yan jî li gel wan kesan be ku dixwazin aştiyê weke mîrateyekê li pey xwe bihêlin. Em aştiyeke xurt dixwazin. Me civakîbûna aştiyê weke HDK’ê danî pêşiya xwe. Di 8-9’ê Sibatê de em ê konferanseke navneteweyî li Stenbolê lidar bixin.”
Piştre Hevberdevkê HDKê Alî Kenanoglû metna îmzeyan xwend. Alî Kenanoglu di metnê de ku ji bo Serokatiya Meclîsê hatiye amadekirin de wiha got: “Ji ber polîtîkayên ewlekariyê yên têkildarî pirsgirêka kurd bi sed hezaran mirovan jiyana xwe ji dest dan, êşên giran rû dan. Pirsgirêka Kurd li benda çareseriyeke demokratîk, aştiyane û civakî ye. Em nikarin dest ji aştiyê û parastina paşeroja jiyana hevpar berdin. Êrîşên li Rojhilata Navîn û Sûriyeyê ku di asta komkujî û qirkirinê de têne kirin, nîşan didin ku aştî ji bo gel û baweriyên li herêmê jiyanî ye. Ji ber vê yekê di serî de Meclîsa Milet a Mezin a Tirkiyeyê (TBMM) em bang li hemû derdorên civakî û siyasî, mirovên bi hesreta jiyaneke wekhev û azad dikin ku ji bo pêkanîna aştiyê bi berpirsyarî rabin. Ji bo rizgariya ji tarîtiya şer û xwegihandina ronahiya aştiyê, ez jî îmzeyê didim.”
Kenanoglû anî ziman ku kampanya wê ji aliyê pêkhateyên wan ve bê meşandin û wiha axivî; “Ev ne tenê kampanya dayina îmzeyan e. Em ê vê yekê di demeke kurt de pêk bînin. Em ê ji aliyê civakîbûna aştiyê ve binirxînin. Em ê bi civîn û kombûnên li hemû bajar û navçeyan vê kampanyayê bimeşînin. Em ê şensê jiyaneke hevpar a aştiyane ya li welatekî hevpar teslîmî kesî nekin.”
