Ji bo endamê PKKê Celal Amed li navçeya Rezan a Amedê mewlûd hat dayîn. Di axaftinan de wiha hat gotin: “Geşkirina pêvajoya aştiyê û hevdîtina bi Serok Apo re ye. Ev yek bi misogerkirina azadiya Serok Apo pêkan e.”
Bi pêşengtiya Komeleya Piştevanî û Alîkariyê ya Malbatên di Dergûşa Şaristaniyê de Xizmên Xwe Winda Kirine (MEBYA-DER) Amedê de ji bo endamê PKKê Celal Amed li Eywana Dawetê ya Geterler a li navçeya Rezan a Amedê mewlûd hat dayîn. Hevserokên partiyên siyasî, parlamenterê Partiya Wekhevî û Demokrasiyê ya Gelan (DEM Partî) yê Rihayê Omer Ocalan, nûnerên saziyên sivîl, Dayîkên Aştiyê, malbata Celal Amed û gelek kes tev li mewlûdê bûn. Di mewlûdê de wêneyên endamê PKKê Celal Amed hate danîn û mûm pêxistin. Piştî pêxistina mûman mewlûd hate xwendin. Piştre ji bo cangoriyan deqîqeyek rêz hate girtin û Çarxa Şoreşê hate xwendin.
‘Divê em ala têkoşîna azadiyê bilind bikin’
Piştî rêzgirtinê parlamentere DEM Partiyê yê Rihayê Omer Ocalan axivî. Omer Ocalan anî ziman ku rêya şehîdan, rêya wan e û berdewama axaftina xwe de da zanîn ku divê li her derê vê rêya şehîdan û heqîqeta wan bi bîr bînin û ev tişt gotin: “Bi dehan sal in, ev têkoşîna destpêkirî berdewam e; bi hezaran zarokên vî miletî yên herî çeleng, zana û qedirbilind canê xwe dan. Wan canê xwe ji bo me, ji bo miletê me û ji bo malbatên me dan. Divê em alaya wan, alaya têkoşîna azadiyê bilind bikin.Em di meha Remezanê de ne ku ji bo Îslamê meheke pîroz e. Maneya rojiyê nefs e; nefs ne tenê birçîbûn û têrbûn e, di heman demê de tê wateya îradeyê. Di têkoşîna azadiyê de jî ya girîng îrade ye. Dema îrade, sekin û bawerî xurt be, em ê xewn û xeyalên şehîdên xwe ji bo miletê xwe pêk bînin. Hevalê Celal Ahmed şahidê hemû têkoşîna azadiyê ye, divê em ked û xebatên wan bilind bikin. Tiştê wan ê herî biqîmet can û bedena wan bû; wan ev ji bo azadiya vî welatî û miletî feda kirin. Divê em, di serî de malbat û dayikên me, li her derê nirx û bîranînên wan li pêşiya xwe deynin û bilind bikin.”
‘Bîranînên wan dê di têkoşîna me de her dem bijîn’
Veysî Aktaş di axaftina xwe de Celal Amed bibîranî û ev tişt gotin: “Armanca me, pêkanîna daxwazên wan e. Hemû têkoşîna me, hemû armanca me ev e. Di vî warî de, divê em pêvajoya aştî û civaka demokratîk bigihînin encamê. Heke em bikaribin vê dawazû pêk bînin, em ê li ser şopa bîranînên hevalên xwe bin. Heke em aştiyê li vî welatî pêk bînin, ez vê jî bibêjim; em ê bi Serok Apo re jî hevdîtinê bikin. Belkî jî bersiva rast a ji bo bîranînên van hevalan; geşkirina pêvajoya aştiyê û hevdîtina bi Serok Apo re ye. Ev yek bi misogerkirina azadiya Serok Apo pêkan e. Di vî warî de, ez careke din li ber bîranînên wan bi rêzdarî bejna xwe ditewînim û em soz didin ku bîranînên wan dê di têkoşîna me de her dem bijîn.”
Piştî vekirina fitarê bernameya mewlûdê bi dawî bû.
