AMED – Di dema ku amadekariyên Newroza 2026an a li Amedê bi dawî dibin de, welatiyên bajêr balê dikşînin ser pîrozbahiyên salên berê. Welatiyên ku salên 90î tînin bîra xwe, destnîşan dikin ku tevî qedexe û zextên dijwar ên wê demê jî, pîrozbahî bi kelecaneke mezin dihatin lidarxistin.
Welatiyên Amedî yên ku şahidiya pêvajoya salên 90î kirine, diyar kirin ku di wê serdemê de pîrozkirina Newrozê ne tenê wekî cejneke wekî , di heman demê de helwestek bû. Li gorî gotinên şahidan, di bin dorpêç û qedexeyan de pîrozbahî bi dizî lê bi coşeke mezin dihatin lidarxistin.
Di bîranînên welatiyan de jiyana gundan a berê jî cîhekî girîng digire. Welatiyên ku zarokatiya wan li gundan derbas bûye, behsa pîroziya pîrozbahiyên Newrozên berê kirin. Bi taybetî welatiyên temen mezin ên ku niha li bajêr dijîn, anîn ziman ku roja Newrozê li gundan wekî cejneke civakî dihat qebûlkirin û mezinên gund di vê rojê de ji bo şahkirina wan diyarî didan zarokan.
Di nava amadekariyên cejna îsal de, welatiyên Amedê bang li hemû gel kirin ku beşdarî pîrozbahiyên sibe bibin. Tê payîn ku Newroza Amedê ya sibe dê bi beşdarbûneke girseyî li Qada Newrozê bê pîrozkirin.
